Աշխարհում հազարավոր քաղաքներ կան, ՀՀ-ն յուրաքանչյուրում պատրաստ է կնքել Ադրբեջանի հետ պայմանագիրը․ Կոստանյան

ՀՀ փոխարտգործնախարար Վահան Կոստանյանն անդրադարձել է մամուլի տեղեկություններին, որ խաղաղության պայմանագիրը հնարավոր է Վաշինգտոնում կնքվի կամ ԱՄԷ–ում։

«Աշխարհում, ենթադրում եմ, կան հազարավոր, եթե ոչ տասնյակ հազարավոր քաղաքներ, այդ քաղաքներից յուրաքանչյուրում Հայաստանը պատրաստ է կնքել Ադրբեջանի հետ հարաբերությունների կարգավորման փաստաթուղթը: Մեզ համար առաջնային է փաստաթղթի կնքման գործընթացը»,– ասել է Կոստանյանը՝ պատասխանելով հարցին, թե արդյոք ճիշտ են այդ տեղեկությունները:

Նա վստահեցրել է՝ Հարավային Կովկասում կայունությամբ և խաղաղությամբ հետաքրքրված բոլոր գործընկերների հետ շարունակում են պահել կապը, իրենց տեղեկացնել ընթացիկ գործընթացների մասին՝ հույս ունենալով, որ նրանք կարող են դրականորեն ազդել գործընթացի վրա։

Հացրին, թե կարո՞ղ է Թուրքիան նպաստել, որ Ադրբեջանը փոխի իր դիրքորոշումը` կապված որոշ հարցերի հետ, ԱԳՆ պաշտոնյան պատասխանել է․ «Ես կարծում եմ՝ թուրքական կողմն առնվազն վերջին մեկ տարվա ընթացքում հանրային բավականին դրական ազդակներ է տվել Հայաստանին և Ադրբեջանին, որ իրենք շահագրգռված են, որպեսզի երկու կողմերի միջև հարաբերությունները կարգավորվեն և համապատասխան փաստաթուղթը կնքեն»: