Մեր երկրում ընտրությունների միջոցով է միայն իշխանությունը փոխվում․ Ավանեսյան

Կարծում եմ, դուք էլ եք ծանոթ թե՛ ձայնագրություններին, թե՛ առգրավված, ներկայացված փաստարկներին: Ես զարմանում եմ, որ դուք հարցը տալիս եք, թե ինչն էր վրդովեցրել: Այս մասին լրագրողների հետ զրույցում ասել է առողջապահության նախարար Անահիտ Ավանեսյանը՝ անդրադառնալով երեկ իր ֆեյսբուքյան էջում կատարված գրառմանը և հստակեցրել՝ իրեն զայրացրել էր «հեղաշրջման փորձը»։

«Ես իմ կարծիքն եմ ներկայացրել»,– նշել է նա։

Լրագրողը հիշեցրել է 2016 թվականին ՊՊԾ գնդի գրավման դեպքերը և այն ժամանակ դրան Նիկոլ Փաշինյանի արձագանքը, ինչին ի պատասխան՝ նախարարն ասել է․ 

«Մեր երկիրը հենց նման դեպքեր, Հոկտեմբերի 27 տեսած երկիր է, և մեր կողմից աչալրջությունը, թե մարդիկ ինչ են խոսում, հրապարակային հեղաշրջման կոչեր են հնչեցնում, կոնկրետ կազմակերպչական աշխատանքներ են տանում և այն, ինչ որ երեկ հրապարակվեց, մեզ մի կաթիլ անգամ կասկածի տեղիք չի տալիս, որ մեր ամբողջ պետական համակարգը չափազանց լուրջ և աչալուրջ պիտի լինի նման դեպքերին: Մեր երկրում բռնությունը տեղ չունի, մեր երկրում ընտրությունների միջոցով է միայն իշխանությունը փոխվում, և 2021 թվականին եղել են արդար, բաց, թափանցիկ ընտրություններ, որտեղ ժողովուրդը իր ձայնը տվել է իշխանությանը:

Հաջորդ ընտրություններին թող սպասեն բոլոր ուժերը, ներկայանան ժողովրդի դատին, ստանան քվե և իշխանություն։ Հայաստանում հեղաշրջումների, ահաբեկչության փուլը փակված է»։