Անցնող տարում «Հայաստան» հիմնադրամի կողմից իրականացվել են մի շարք կարևոր ծրագրեր. Վահագն Խաչատուրյան

Երևանում ընթանում է «Հայաստան» համահայկական հիմնադրամի հոգաբարձուների խորհրդի նիստը։ 

Նիստի մեկնարկին ելույթ ունեցավ Հայաստանի Հանրապետության նախագահ, «Հայաստան» հիմնադրամի հոգաբարձուների խորհրդի նախագահ Վահագն Խաչատուրյանը։  

«Այսօրվա նիստը կարևոր հանգրվան է՝ ամփոփելու հիմնադրամի անցած տարվա գործունեության արդյունքները, արժևորելու կատարած աշխատանքն ու արձանագրելու ձեռքբերումները։ Միաժամանակ սա նաև հարթակ է արձանագրելու այն առաջնահերթությունները, որոնցով պետք է առաջնորդվի հիմնադրամն առաջիկայում։ Անցնող տարում իրականացվել են մի շարք կարևոր ծրագրեր, որոնց միջոցով նոր շունչ է հաղորդվել հիմնադրամի առաքելությանը, սակայն մեր առջև դեռևս կանգնած են բազում մարտահրավերներ թե՛ ռազմավարական պլանավորման, թե՛ ծրագրերի արդյունավետության բարձրացման, թե՛ համահայկական ներուժի լիարժեք օգտագործման տեսանկյունից»,- ասել է ՀՀ նախագահը։ 

ՀՀ նախագահի խոսքով՝ այս նիստը նաև առիթ է վերահաստատելու հիմնադրամի բովանդակային և կառուցվածքային զարգացման ճանապարհային քարտեզը ընդլայնելու ներգրավվածությունը, ուժեղացնելու վստահությունը և բարձրացնելու արդյունավետությունը` ի նպաստ Հայաստանի Հանրապետության և ողջ սփյուռքի բարգավաճման։  

«Համոզված եմ, որ մեր այսօրվա քննարկումները կնպաստեն հիմնադրամի աշխատանքների առավել հստակ ուղղորդմանը` հենված թափանցիկության, պատասխանատվության և ներառականության սկզբունքների վրա։  Շնորհակալություն եմ հայտնում հոգաբարձուների խորհրդի բոլոր անդամներին, հիմնադրամի աշխատակիցներին, աշխատակազմին և, իհարկե, բոլոր նվիրատուներին իրենց հանձնառության, հետևողականության և համատեղ աշխատանքի համար մաղթում եմ արդյունավետ քննարկումներ և աշխատանք»,- նշել է Խաչատուրյանը։ 

Նիստի օրակարգում ընդգրկված է երեք հարց՝ «Հայաստան» հիմնադրամի 2024 թվականի գործունեության և ֆինանսական հաշվետվությունը, Հիմնադրամի 2025 թվականի բյուջեի հաստատումը, ինչպես նաև 2025-2026 թվականների աուդիտ իրականացնող անձ ընտրելու հարցը։