Չորս կանայք փրկվել են կայծակի հարվածից և դաջել նույն tatoo-ն՝ որպես հիշատակ

Ֆլորիդայի Մարկո կղզում արձակուրդում գտնվող չորս ամերիկուհիներ՝ երկու քույրեր և նրանց երկու ընկերուհիներ, փրկվել են կայծակի հարվածից և որոշել են այդ պահին նվիրված միանման tatoo դաջել։ Այս մասին հայտնում է People-ը։

Դանիել և Թեյլոր Սթերջիլ քույրերը, ինչպես նաև Բեքի Ջոնսոնն ու Քելլի Բրայանթը փորձում էին պատսպարվել փոթորիկից ծղոտե տանիքով մի տնակում, երբ կայծակը հարվածել է հենց այդ շինությանը։ Կանայք հիշում են՝ մի պահ կորցրել են գիտակցությունը, ունեցել լսողության ու տեսողության խանգարումներ, սակայն մեծ վնասներից զերծ են մնացել։

Փրկարարների խոսքով՝ կայծակը չհարվածեց ուղիղ նրանց, սակայն էլեկտրական դաշտի ազդեցությունն ազդել է նրանց վրա։ Տուժածներին հոսպիտալացրել են կանխարգելիչ նպատակով։ Դեպքից հետո նրանք որոշել են հիշատակել այս «աղջկական փրկությունը»՝ նույն կայծակաձև tatoo-ով։