Լեհաստանի պաշտպանության նախարարը կոչ է արել Ուկրաինային ճանաչել Վոլինյան կոտորածը որպես լեհերի ցեղասպանություն

Լեհաստանի պաշտպանության նախարար Վլադիսլավ Կոսինյակ-Կամիշը հայտարարել է, որ Ուկրաինան պետք է պաշտոնապես ճանաչի Վոլինյան կոտորածը և դրա ընթացքում իրականացված լեհերի ցեղասպանությունը։ Նրա խոսքով՝ պատմության այդ էջը չի կարելի մոռանալ, և ապագան կառուցվում է միայն անցյալի հանդեպ հարգանքի և ճշմարտության հիման վրա, գրում է Лента.ру-ն։

«Դա վերք է, որը չի կարող բուժվել, քանի դեռ այն ամբողջությամբ չի մաքրվել։ Իսկ մաքրումն այստեղ՝ նշանակում է ճանաչում», — նշել է Կոսինյակ-Կամիշը։ Նա ընդգծել է, որ չի ցանկանում սրել լարվածությունը Ուկրաինայի և Լեհաստանի միջև, սակայն կարևորում է պատմական արդարության վերականգնումը։

Հուլիսի 11-ին Լեհաստանում նշվում է լեհ ժողովրդի ցեղասպանության զոհերի հիշատակի ազգային օրը։ Այդ ողբերգությունը կապված է Ուկրաինայի ազգային միավորումների և Ուկրաինական ապստամբական բանակի գործողությունների հետ՝ որոնք, ըստ լեհական կողմի, հանգեցրել են զանգվածային սպանությունների։ Տարբեր լեհ քաղաքական գործիչներ վերջին շրջանում քննադատել են Կիևին՝ համերաշխության պակասի և պատմական հարցերը անտեսելու համար։