«Հիմա ոչ ոք մեզ չի ասում նման բան»․ Խաչատուրյանը՝ Օվերչուկի հայտարարության մասին

ՀՀ նախագահ Վահագն Խաչատուրյանը անդրադարձել է Ռուսաստանի փոխվարչապետ Ալեքսեյ Օվերչուկի հայտարարությանը, որը գարնանը, խոսելով Հայաստանի՝ ԵՄ-ին հնարավոր միացման մասին, նշել էր, թե հանրապետությունը ստիպված կլինի ընտրել ԵԱՏՄ-ի և ԵՄ-ի միջև, քանի որ «հնարավոր չէ նստել երկու աթոռի վրա»։

«Դուք պետք է հենց Օվերչուկին հարցնեք, թե սա ինչ է նշանակում։ Գոնե հիմա ոչ ոք մեզ չի ասում նման բան, և մենք որևէ խախտում չենք անում։ Մինչ այս պահը խնդիր չի առաջացել», – ասել է Խաչատուրյանը՝ ընդգծելով, որ Հայաստանը ունի դիվերսիֆիկացված տնտեսություն։

Խաչատուրյանը նաև նշել է, որ Հայաստանը տնտեսապես կախված է Ռուսաստանից։ Սակայն, ըստ նրա, Ռուսաստանը նույնպես տնտեսապես կախված է հանրապետությունից։ Երևանը ցանկանում է, որ Մոսկվան հաշվի առնի Հայաստանի իշխանությունների անկախ որոշումները։