«Սուրբ Գրիգոր Լուսավորիչ» ԲԿ տնօրենի երկրորդ մրցույթը տեղի կունենա նոյեմբերի 14–ին

ՀՀ ԱՆ «Սուրբ Գրիգոր Լուսավորիչ» բժշկական կենտրոնի տնօրենի թափուր պաշտոնի համար երկրորդ մրցույթը տեղի կունենա 2025 թվականի նոյեմբերի 14–ին։ Հայտարարությունն այս մասին զետեղվել է առողջապահության նախարարության կայքում։ Ըստ հայտարարության՝ դիմումների ընդունման վերջնաժամկետը հոկտեմբերի 13–ն է։

Հիշեցնենք, որ սեպտեմբերի 2–ին կայացած մրցույթում հաղթող չեղավ: Մրցույթին մասնակցում էին 2 թեկնածու` ԲԿ-ի տնօրենի ժամանակավոր պաշտոնակատար, ԱԺ ՔՊ խմբակցության նախկին պատգամավոր, ԱԺ առողջապահության հարցերի հանձնաժողովի նախկին նախագահ Նարեկ Զեյնալյանը և առողջապահության կազմակերպիչ Նարեկ Վանեսյանը:

Հիշեցնենք, որ Զեյնալյանը հրաժարական տվեց շուրջ 1 տարի առաջ Փաշինյանի "խնդրանքով": Դրան նախորդել էր Զեյնալյանի ու Արգիշտի Քյարամյանի լեզվակռիվը ԱԺ-ում:

Սուրբ Գրիգոր Լուսավորիչ ԲԿ–ի նախկին տնօրեն Արման Հովակիմյանը հեռացավ պաշտոնից այս տարվա մարտին, որպես պատճառ նշվում էին պացիենտների  այսպես կոչված «նվիրատվությունները», որոնք բացահայտել էր ՊՎԾ–ն։ Այն ժամանակ արդեն որպես կենտրոնի տնօրենի հավանական թեկնածու շրջանառվում էր Նարեկ Զեյնալյանի անունը, որը հետագայում նշանակվեց ԺՊ։