Վիրահայոց թեմում Սուրբ խաչի տոնը նշանավորվել է Մուսա լեռան ավանդական հարիսայի փառատոնով
Հասարակություն
2025 թվականի սեպտեմբերի 14-ին Հայոց Եկեղեցին տոնեց Խաչվերացը՝ Հայաստանյայց Եկեղեցու հինգ տաղավար տոներից վերջինը: Վիրահայոց թեմում բարի ավանդույթ է դարձել եկեղեցական տոնական օրերը նշանավորել ազգային ավանդական փառատոներով:
Վիրահայոց թեմի առաջնորդ Գրշ. Տեր Կիրակոս եպս. Դավթյանի օրհնությամբ և աջակցությամբ, Վրաստանի հայ կանանց «Շուշանիկ» միության նախաձեռնությամբ Սուրբ խաչի տոնը նշանավորվեց Մուսա լեռան ավանդական հարիսայի փառատոնով:
Թեմի «Հայարտուն» կենտրոնի Գալուստ Գյուլբենկյան սրահի երկայնքով սեղաններին շարվել էին Եկեղեցասեր կանանց և «Հ.Մ.Ը.Մ Թիֆլիս» հասարակական կազմակերպության անդամների պատրաստած յուղալի հարիսայով կաթսաները:
Միջոցառմանը իրենց օրհնաբեր ներկայությունն էին բերել Գրշ. Տեր Կիրակոս եպս. Դավթյանը, Մայր Աթոռ Սուրբ Էջմիածնի միաբան ՀՀ Քրեակատարողական հիմնարկությունների հոգևոր առաջնորդ Հոգեշնորհ Տեր Ռուբեն վարդապետ Զարգարյանը:
Օրհնության խոսքում Թեմակալ առաջնորդը ներկաներին շնորհավորեց Խաչվերացի, ժողովրդի շրջանում տարածված Սըբխեչի կապակցությամբ, անդրադարձ կատարեց Մուսա լեռան հերոսամարտի հիշատակը հարիսայով նշելու ավանդույթին: Սրբազան Հայրն իր օրհնությանն արժանացրեց «Շուշանիկ» միության անդամներին, եկեղեցասեր կանանց խմբերին, երկու եկեղեցիների խաչի քավորներ՝ Արկադի Հովակիմյանին և Կարեն Դարբինյանին, «Արմենիա» խանութի տնօրեն Էդուարդ Մուրադյանին և բոլոր մասնակիցներին ցուցաբերած աջակցության և եկեղեցու կողքին կանգնելու համար և առաջարկեց հոգեշնորհ Հայր Ռուբեն վարդապետ Զարգարյանին օրհնելու հարիսայով զարդարված սեղանները:
Այնուհետև սկսվեց հարիսայի համտեսն ու հյուրասիրությունը՝ ներդաշնակված Հայարտուն» կենտրոնի դուդուկի խմբի ղեկավար Իվանե Մկրտչյանի կազմած ուրախ երգ-երաժշտության հետ, ստեղծելով տոնական ուրախ տրամադրություն:
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
