ԱՄՆ-ն Ճապոնիայում ցուցադրել է Typhon հրթիռային համակարգը՝ սրելով Ասիայի սպառազինությունների մրցավազքը

ԱՄՆ-ն առաջին անգամ Ճապոնիայում ցուցադրել է Typhon միջին հեռահարության հրթիռային համակարգը՝ ընդգծելով Վաշինգտոնի և Տոկիոյի պատրաստակամությունը հակազդելու Չինաստանի աճող ռազմական ներուժին։ Հրթիռային կայանը, որը կարող է հարվածել Չինաստանի արևելյան ափերին և Ռուսաստանի որոշ շրջաններին, ներկայացվել է «Resolute Dragon» համատեղ զորավարժությունների շրջանակում՝ ներգրավելով շուրջ 20 հազար ամերիկացի և ճապոնացի զինծառայողներ։

Typhon համակարգը նախկինում տեղակայվել էր Ֆիլիպիններում՝ առաջացնելով Պեկինի և Մոսկվայի կոշտ քննադատությունը, իսկ այժմ Ճապոնիայում տեղակայումը կարող է ավելի ուժեղ արձագանք ստանալ։ Համակարգը կարող է արձակել Tomahawk և SM-6 հրթիռներ, ինչը հնարավորություն է տալիս ԱՄՆ-ին և դաշնակիցներին արագ ամրապնդել դիրքերը Ասիայում՝ հակակշռելու Չինաստանի հզոր հրթիռային զինանոցին։

Ճապոնիան էլ իր հերթին ավելացնում է ռազմական ծախսերը՝ գնում է Tomahawk-ներ և մշակում սեփական միջին հեռահարության հրթիռներ՝ Երկրորդ համաշխարհային պատերազմից ի վեր ամենամեծ ռազմական բարեփոխման շրջանակում։ Տարածաշրջանում լարվածությունը աճում է նաև Թայվանի ռազմական բյուջեի սպասվող աճի ֆոնին, մինչ ԱՄՆ-ը Typhon-ը դիտարկում է որպես արագ արտադրվող և ռազմավարական զենք՝ «Առաջին կղզային շղթայի» պաշտպանությունը ամրապնդելու համար, հայտնում է Reuters-ը։