Մինսկի խումբը երկար ժամանակ չգործող մի կառույց էր. արցախցիները պետք է իրենց կյանքը գտնեն ՀՀ–ում. Ֆինլանդիայի դեսպան

Դա Հայաստանի և Ադրբեջանի կառավարությունների որոշումն էր, և իհարկե ԵԱՀԿ-ն ուրախությամբ հետեւց դրան։ Այս մասին այսօր՝ սեպտեմբերի 15–ին, «Համապարփակ անվտանգություն և դիմակայություն 2025» միջազգային համաժողովի շրջանակներում NEWS.am–ի հետ զրույցում նշեց Հայաստանում Ֆինլանդիայի Հանրապետության արտակարգ և լիազոր դեսպան Կիրստի Նարինենը՝ անդրադառնալով ԵԱՀԿ Մինսկի խումբը լուծարմանը։

Հարցին՝ ձեր կարծիքով, միջազգային ինչ մեխանիզմներով է հնարավոր ապահովել արցախցիների իրավունքները, նա պատասխանեց. «Կարծում եմ՝ Մինսկի խումբը բավական երկար ժամանակ չգործող մի կառույց էր, որը պարզապես գոյություն ուներ, բայց գործնականում, անկեղծ ասած, որպես գործիք չէր կարող օգտագործվել որևէ բանի համար։

Ինչ վերաբերում է արցախցիներին, Լեռնային Ղարաբաղի տեղահանված մարդկանց, ես կարծում եմ, որ լավագույն բանը, որ մենք կարող ենք անել, դա աջակցելն է  Հայաստանին՝ կառուցելու իր դիմակայունությունը, իր բարգավաճումը և ստեղծելու տնտեսական, քաղաքական և սոցիալական հնարավորություններ այդ մարդկանց համար, որպեսզի նրանք վերաբնակվեն և իրենց կյանքը գտնեն այստեղ։ Իսկ եթե խոսում ենք երկարաժամկետ հեռանկարի մասին, դա այս պահին դատողություններ անելն անհնար է»։

Ինչ վերաբերում է նրան, թե որքանո՞վ է մոտ խաղաղությունը տարածաշրջանում, կարող են Հայաստանն ու Ադրբեջանը վերջնական խաղաղություն հաստատել, դեսպանն արձագանքեց. «Միանշանակ։ Ֆինն խաղաղության Նոբելյան մրցանակակիրն ասել է, որ խաղաղությունը կամքի հարց է։ Ուրեմն եթե կա խաղաղություն ունենալու կամք և հաշտեցում երկու ժողովուրդների և պետությունների միջև, դա, անշուշտ, հնարավոր է։ Պարզապես, իմ պատկերացմամբ, դրա համար ժամանակ, ջանք է պահանջվելու, գուցե մի փոքր ավելի երկար, քան մենք կարծում ենք, որպեսզի կառուցվեն մանրաթելեր, հետո գուցե թելեր, հետո պարաններ՝ երկու ժողովուրդների միջև կապեր ստեղծելու համար։

Այս պահին պետությունների ղեկավարները հանդիպել են,  այլ մակարդակներով նույնպես կապեր են ապահովվում, բայց հիմա մեզ պետք է հաջորդ փուլը՝ որ ժողովուրդները զգան, որ կարող են վստահել միմյանց և որ կարող են շփվել և համագործակցել իրար հետ։ Իսկ դա արագ գործընթաց չէ»։