Կայացել են Հայաստանի եւ Թաիլանդի ԱԳՆ-ների միջեւ առաջին քաղաքական խորհրդակցությունները

Կայացել են Հայաստանի Հանրապետության և Թաիլանդի Թագավորության արտաքին գործերի նախարարությունների միջև առաջին քաղաքական խորհրդակցությունները՝ ՀՀ ԱԳՆ Ասիայի և խաղաղօվկիանոսյան երկրների վարչության պետ Անահիտ Կարապետյանի և Թաիլանդի ԱԳՆ Եվրոպական հարցերի վարչության գլխավոր տնօրեն Կրոնգկանիտ Ռակչարեոնի գլխավորությամբ:

Կողմերը քննարկել են երկկողմ համագործակցության հեռանկարները՝ երկուստեք պատրաստակամություն հայտնելով զարգացնել առկա քաղաքական երկխոսությունը:

Հանդիպման ընթացքում անդրադարձ է կատարվել երկկողմ օրակարգին վերաբերող հարցերի լայն շրջանակի, այդ թվում՝ տնտեսական կապերի զարգացմանը, զբոսաշրջության, տեղեկատվական տեխնոլոգիաների և նորարարությունների ոլորտներում համագործակցության հնարավորություններին, իրավապայմանագրային դաշտի ընդլայնմանը, կրթական և մշակութային փոխանակումներին:

Կողմերն անդրադարձ են կատարել նաև միջազգային կազմակերպություններում և այլ բազմակողմ հարթակներում համագործակցությանը:

Այցի շրջանակներում պատվիրակությանն ընդունել է նաև ՀՀ արտաքին գործերի նախարարի տեղակալ Մնացական Սաֆարյանը, որի հետ հանդիպմանը ևս անդրադարձ է կատարվել Հայաստան-Թաիլանդ հարաբերությունների երկկողմ և բազմակողմ օրակարգի մի շարք հարցերի, տարածաշրջանային զարգացումներին:

ՀՀ ԱԳ նախարարի տեղակալը թաիլանդական կողմին է ներկայացրել ՀՀ կառավարության կողմից մշակված «Խաղաղության խաչմերուկ» նախագիծը: