Ռուսաստանում «անհեթեթություն» են անվանել Լոնդոնի սպառնալիքները

Ռուսաստանի Պետդումայի միջազգային գործերի կոմիտեի առաջին փոխնախագահ Ալեքսեյ Չեպան խիստ քննադատել է Մեծ Բրիտանիայի սպառնալիքները՝ կապված իբր ռուսական դրոնների մուտքի հետ ՆԱՏՕ-ի օդային տարածք։ Նրա խոսքով՝ որևէ ապացույց չկա, որ դաշտում հայտնված անօդաչուները ռուսական էին։

«Սա բացարձակ անհեթեթություն է։ Ո՛չ ապացույցներ կան, ո՛չ էլ որևէ նպատակ։ Այն, ինչ անում են Լոնդոնը և Վարշավան, ընդամենը քաղաքական խաղ է միջազգային իրավունքի խախտումներով։ Եվ շատ եվրոպացի փորձագետներ էլ հասկանում են դա», — նշել է Չեպան՝ հավելելով, որ բրիտանական սպառնալիքները «խելահեղություն» են։

Ինցիդենտը տեղի էր ունեցել սեպտեմբերի 10-ի գիշերը, երբ անորոշ ծագմամբ անօդաչուներ հատել էին Լեհաստանի սահմանը։ Ռուսաստանի ՊՆ-ն հայտարարել էր, որ նման գործողություն չի պլանավորվել, իսկ հարվածների իրական թիրախը եղել են Ուկրաինայի արևմտյան օբյեկտները։ Դիվանագիտական մակարդակում Մոսկվան ևս ընդգծել է, որ չի ցանկանում հակամարտություն ՆԱՏՕ-ի երկրների հետ։