Դանիան Կոպենհագենի օդանավակայանի ԱԹՍ միջադեպը կապում է Եվրոպայում աճող հիբրիդային հարձակումների հետ

Դանիայի իշխանությունները հայտարարել են, որ Կոպենհագենի գլխավոր օդանավակայանի աշխատանքը դադարեցրած անօդաչուները ամենալուրջ հարձակումը դարձան երկրի կարևորագույն ենթակառուցվածքների դեմ։ Վարչապետ Մետե Ֆրեդերիկսենը նշել է, որ դեպքը տեղավորվում է Եվրոպայում վերջին շրջանում արձանագրված զարգացումների մեջ՝ օդային տարածքի խախտումներ, կիբերհարձակումներ և ենթադրյալ դիվերսիաներ։

Երկուշաբթի երեկոյան նկատված երկու-երեք խոշոր ԱԹՍ-ների պատճառով Կոպենհագենի օդանավակայանը փակ էր գրեթե չորս ժամ։ Նմանատիպ միջադեպ գրանցվեց նաև Օսլոյի օդանավակայանում, որը ժամանակավորապես դադարեցրեց թռիչքները։ Արդյունքում տասնյակ հազարավոր ուղևորներ մնացին առանց թռիչքի։ Ոստիկանությունը չի բացառում, որ սարքերը կարող էին գործարկվել նավերից, որոնք մտնում կամ դուրս էին գալիս Բալթիկ ծովի նեղուցով։

Ֆրեդերիկսենը հիշեցրել է Լեհաստանի, Ռումինիայի և Էստոնիայի տարածք ներխուժած ռուսական անօդաչուների ու կործանիչների դեպքերը՝ չբացառելով Մոսկվայի դերակատարությունը։ Ռուսաստանի դեսպանը Դանիայում այդ մեղադրանքները անվանել է «հիմք չունեցող»՝ նշելով, թե դրանք նպատակ ունեն ՆԱՏՕ-ն հրահրել բաց ճակատամարտի։ Վերջին տարիներին արևմտյան հատուկ ծառայությունները Մոսկվային բազմիցս մեղադրել են հիբրիդային սպառնալիքների մեջ՝ կիբերհարձակումներից մինչև ապատեղեկատվական արշավներ, հայտնում է Reuters-ը։