Ի՞նչ ծրագրեր է իրականացնելու վարչապետի աշխատակազմը հաջորդ տարի

«Մեր բյուջեում, ըստ էության, մեծ փոփոխություններ տեղի չեն ունեցել՝ ընթացիկ՝ տարվա համեմատ: Նախատեսված է շուրջ 25 միլիարդ 804 միլիոն դրամ հաջորդ տարվա ծախսերի համար։ Մենք իրականացնելու ենք 10 ծրագիր, 39 միջոցառում, որից մեկը վարկային ծրագիր է՝ երկու միջոցառումներով։

2026 թվականի բյուջեով նախորդ տարվա համեմատ ավելացել են երկու միջոցառումներ․

Տեսչական վերահսկողության ծրագրի շրջանակներում Սննդամթերքի անվտանգության տեսչական մարմնի կողմից իրականացվող նոր մեկ միջոցառում․ նախկինում իրականացվող մի քանի միջոցառումները միավորվել են այդ մեկ միջոցառման մեջ։ Այն կոչվելու է տեսչական վերահսկողության շրջանակում սննդամթերքի լաբորատոր հետազոտություն։

Նաև մեր բյուջեով հաջորդ տարվա ընթացքում նախատեսված է իրականացնել մեկ միջոցառում՝ Եվրոպական քաղաքական համայնքի ութերորդ գագաթնաժողովը, որի շրջանակներում շուրջ 50 պատվիրակություններ Եվրոպայից ժամանելու են Հայաստան:

Սա, ուզում եմ հիշեցնել, ամեն կես տարին մեկ Եվրոպայում տեղի ունեցող միջոցառում է, որտեղ երկրի ղեկավարները հավաքվում են, քննարկում են ընթացիկ հարցեր և մենք նախատեսում ենք այս միջոցառումը իրականացնել մայիսի սկզբին։ Աշխատակազմի բյուջեով նախատեսված է 1 միլիարդ դրամ։ Հիմա մրցույթ է հայտարարված»,– ասաց Հարությունյանը՝ նշելով, որ անհրաժեշտության դեպքում պահուստային ֆոնդից դումար կհատկացնեն։

Նա նաև նշեց, որ 2025 թվականի պետական բյուջեով նախատեսված թվով ութ միջոցառումներ 2026 թվականի բյուջեով նախատեսված չեն և չեն իրականացվելու։

Հարությունյանը հստակեցրերց, որ խոսքը վարչապետի աշխատակազմի և վեց տեսչական մարմինների աշխատակազմերի մասով տեխնիկական հագեցվածության բարելավման միջոցառումների մասին է:

Վարչապետի աշխատակազմի ղեկավարը նաև նշեց ընթացիկ տարում իրականացված այն ծրագրերը, որոնք շարունակականություն են ունենալու։

«Դրանք են պետական հատվածի արդիականացման ծրագիրը, աջակցություն հասարակական և այլ կազմակերպությունների ծրագիրն է, հանրային իրազեկում ծրագիրն է, քաղաքացիական ծառայողների վերապատրաստում ծրագիրն է, վարչապետի լիազորությունների իրականացման ապահովման ծրագիրն է, տեսչական վերահսկողության ծրագիրն է»,– թվարկեց Հարությունյանը՝ հավելելով․ «Հաջորդ միջոցառումը տոների և հիշատակի օրերի ծրագիրն է և միջազգային դատարաններում, միջազգային արբիտրաժներում և այլ միջազգային ատյաններում ՀՀ շահերի ներկայացման և պաշտպանության, դրանց կողմից ընդունված վճիռների և որոշումների կատարման ապահովումն է»:

Նրա խոսքով՝ ընթացիկ տարվա բյուջեի համեմատ փոփոխություններ են եղել, բայց դրանք նշանակալի չեն։