Արտահերթի կարիք չկա, գնում ենք հերթական ընտրությունների․ Արայիկ Հարությունյան

Գնահատել ենք, որ արտահերթի կարիք չկա, գնում ենք հերթական ընտրությունների, խնդրում եմ ավելորդ ինտրիգներ չփնտրել։ Այս մասին լրագրողների հետ ճեպազրույցում ասել է վարչապետի աշխատակազմի ղեկավար Արայիկ Հարությունյանը, որը նաև նշանակվել է ՔՊ նախընտրական շտաբի պետ։

«Շտաբի ձևավորումը կապված է նրա հետ, որ առաջին անգամ իշխանությունն ուզում է առանց տարբեր հարցերում ցայտնոտների, շտապողականության ճիշտ կազմակերպել աշխատանքը»,– ասաց նա՝ ընդգծելով․ «Մենք գնում ենք հունիսին կայանալիք հերթական ընտրություններին»։

Պատասխանելով լրագրողի հարցին, թե «ինչո՞ւ եք շտապում, եթե ձեր բոլոր ուժեղ մրցակիցները մինչև հունիս արդեն բանտում կլինեն», նա նշեց․ «Ձեր սարկազմը տեղին չէ։ Մենք ապրում ենք իրավական պետությունում։ Բոլոր նրանք, ովքեր հանցանք են գործում, լինի դա ընդդիմություն, թե իշխանություն, հայտնվում են համապատասխան տեղերում կամ հարուցվում են համապատասխան վարույթներ»։