Վերանորոգվել են «Արմավիր» ՔԿՀ կարանտինային խցերը. Գալյան

««Արմավիր» ՔԿՀ կարանտինային խցերը վերանորոգել ենք, «Արմավիր» ՔԿՀ-ում չկար 24-ժամյա ջրամատակարարում, այսուհետև կա: Մյուս բոլոր ՔԿՀ-ներում հիմնարկի միջոցների հաշվին իրականացվել և իրականացվելու են վերանորոգման աշխատանքներ»:

Այս մասին ԱԺ մշտական հանձնաժողովների համատեղ նիստի ժամանակ ասել է ՀՀ արդարադատության նախարար Սրբուհի Գալյանը՝ անդրադառնալով ՔԿՀ-ներում պատժի կրման պայմաններին:

Գալյանը վստահեցրել է, որ  մի շարք հիմնարկներում աշխատանքներն արդեն կատարվել են, մյուսներում շարունակվում են, ապա հիշեցրեց իր՝ «Արթիկ» ՔԿՀ վերջին այցի մասին, որտեղ ըստ նախարարի՝ կատարված աշխատանքները երևում են:

««Արթիկ» ՔԿՀ-ում, օրինակ, ջրահեռացման համակարգն ենք ուսումնասիրել, տեսել, որ մինչև հիմա չկա: Դրա վրա ենք աշխատում, որպեսզի մեր կատարած վերանորոգման աշխատանքներն ապարդյուն չլինեն, այսինքն՝ մեկ տարվա կյանք չունենան, և դրանից հետո նորից կշարունակենք աշխատանքները, բայց տարբերությունը սարերի ու ձորերի է:

««Աբովյան» ՔԿՀ-ն գրեթե ամբողջությամբ վերանորոգված է, այնտեղ միայն լանդշաֆտի խնդիր ունենք լուծելու, այսինքն՝ բակային հատվածում խնդիրներ ունենք լուծելու և երկարաժամկետ տեսակցությունների սենյակների մասով փոքր-ինչ փոփոխություններ ունենք անելու: Մնացած հատվածներն ամբողջությամբ վերանորոգված են»,- մանրամասնել է նախարարը և նշել, որ բոլոր խնայողություններն ուղղվել են գույքագրված խնդիրների լուծմանը: