Ֆրանսիան որոշել է արտահանձնել ռուս բասկետբոլիստ Կասատկինին ԱՄՆ-ին

Փարիզի վերաքննիչ դատարանի քննչական պալատը որոշում է ընդունել արտահանձնել ռուս բասկետբոլիստ Դանիիլ Կասատկինին Միացյալ Նահանգներ։ Ինչպես հայտնում է РИА Новости-ն, դատարանի նախագահը նշել է, որ այժմ մեկնարկում է վարչական գործընթացը, որի համար անհրաժեշտ է Ֆրանսիայի վարչապետի և արդարադատության նախարարի վերջնական հաստատումը։

Կասատկինը ավելի վաղ հրաժարվել էր արտահանձնվելուց և պատմել էր իր ձերբակալության մանրամասները։ Նրա խոսքով՝ ինքը Փարիզ էր ժամանել հարսնացուի՝ Աննայի հետ, սակայն օդանավակայանում փաստաթղթերի ստուգման ընթացքում իրեն ձերբակալել են և սկսել խուզարկություն։

Ռուս մարզիկը ձերբակալվել էր հունիսի 21-ին՝ ԱՄՆ-ի պահանջով։ Նրան մեղադրում են հաքերական ցանցին մասնակցելու, վնասաբեր ծրագրերի միջոցով շորթման գործողություններ իրականացնելու և բանակցություններ վարելու մեջ։ Կասատկինի գործը գտնվում է Ֆրանսիայի արդարադատական մարմինների վերահսկողության ներքո, իսկ վերջնական որոշումը կկայացվի քաղաքական մակարդակով։