Իրեն շատ չեմ ճանաչում, ներկայացել է որպես սարկավագ․ Ստեփան Ասատրյանը՝ «ՔՊ–ական դպիրի» մասին

Այսօր հանրությունը շատ չի քննարկում Հովհաննավանքի «զամոկի» միջուկների հարցը: Այսօր հանրությունը ավելի լուրջ հարցեր է քննարկում, որ իսկապես այսպես՝ տոննայանոց հարցեր են։ Այս մասին լրագրողերի հետ զրույցում ասել է կարգալույծ հռչակված Ստեփան Ասատրյանը՝ անդրադառնալով տեղեկություններին, որ փոխել է Հովհաննավանիքի կողպեքը և բանալիները միայն իր մոտ են։

Նա ծիծաղով նշել է՝ «Վեհափառի տված բնակարանի կողպեքն էլ եմ փոխել, ի դեպ, որովհետև աշխատող չէր»։

Անդրադառնալով մամուլում շրջանառվող տեղեկություններին, որ կիրակնօրյա «պատարագին» մասնակից դաջվածքով դպիրը երիտասարդ ՔՊ-ական է՝ նա նշել է․ «Ես եպիսկոպոս գիտեմ, որ դաջվածքներ ունի։ Կիրակնօրյա պատարագի ժամանակ խորանի վրա ծառայողները հոգևորական չեն եղել, բայց եկեղեցում ծառայողներ են եղել։

Իրեն շատ չեմ ճանաչում, չգիտեմ՝ իրեն համարում է եկեղեցական, թե ոչ, ներկայացել է որպես սարկավագ, ես էլ ասել եմ՝ եթե եկեղեցում ծառայող ես, սա էլ է եկեղեցի, կարող ես ծառայել»։

Նա նաև հայտնել է, որ եղբոր հետ տարաձայնություններ չունի, իրենք տարբեր կողմերի չեն հարում․ «Մենք տարբեր կողմերի չենք հարում, երկուս էլ Քրիստոսին ենք հարում»,– ասել է կարգալույծ քահանան՝ հավելելով, որ նրան մի քանի օր առաջ է հանդիպել։