Կայացել է ԵՄ-Հայաստան ներդրումների համակարգման հարթակի չորրորդ հանդիպումը

Փոխվարչապետ Մհեր Գրիգորյանի և Եվրոպական հանձնաժողովի Արևելյան հարևանության և Թուրքիայի հարցերով տնօրեն Ադրիեն Կիրալիի համանախագահությամբ Կառավարությունում կայացել է ԵՄ-Հայաստան ներդրումների համակարգման հարթակի չորրորդ հանդիպումը:

Փոխվարչապետը հանդես է եկել բացման խոսքով և բարձր է գնահատել Եվրամիության հետ Հայաստանի հարաբերությունների մակարդակը՝ այդ համատեքստում կարևորելով այս հարթակի դերը։

«Հայաստան-Եվրամիություն քաղաքական երկխոսությունը և ընդլայնվող գործընկերության օրակարգը հիմնված են կայուն զարգացման, տնտեսական աճի և տարածաշրջանի դիմակայունության բարձրացմանը միտված նույնական մոտեցումների վրա։ Այս հարթակը միավորում է Հայաստանի Հանրապետության կառավարության, Եվրամիության և միջազգային ֆինանսական կազմակերպություններին՝ խթանելով ներդրումներ, որոնք նպաստում են կայուն զարգացմանը և տնտեսական աճին»,- նշել է փոխվարչապետ Մհեր Գրիգորյանը:

Քննարկման ընթացքում ներկայացվել է Տնտեսական ներդրումային պլանի իրականացման շրջանակներում գրանցված առաջընթացը, անդրադարձ է կատարվել ընթացիկ և նախատեսվող ներդրումային ծրագրերին:

Հարթակի քննարկմանը նախորդել է փոխվարչապետի հանդիպումը Եվրոպական հանձնաժողովի ԵՄ ԱԳԵԾ և ԵՀ-ի համատեղ բարձրաստիճան պատվիրակության հետ, որի ընթացքում անդրադարձ է կատարվել ՀՀ-ԵՄ ընդլայնվող գործընկերության օրակարգային հարցերին, այդ թվում՝ բարձր մակարդակի քաղաքական երկխոսության բաղադրիչներին: