Գեներալ Ակրամինիա. ԱՄՆ-ն և Իսրայելը երբեմնի խաղաղ Հորմուզի նեղուցը վերածել են վտանգավոր ջրային ուղու

Իրանական բանակի ներկայացուցիչ, բրիգադի գեներալ Մոհամադ Ակրամինիան հայտարարել է, որ Պարսից ծոցի Հորմուզի նեղուցը վտանգավոր ջրային ուղի է դարձել բացառապես Միացյալ Նահանգների և Իսրայելի գործողությունների պատճառով, հայտնում է Press TV-ն:

«Հորմուզի նեղուցը միշտ եղել է անվտանգ ու խաղաղ անցում, և նույնիսկ արտատարածաշրջանային երկրներն են այն օգտագործել իրենց նավերի տարանցման համար: Սակայն այս ագրեսիայից հետո իրավիճակը փոխվել է»,- հայտարարել է բրիգադի գեներալ Մոհամադ Ակրամինիան:

Ըստ գեներալի, անընդունելի է, որ Իրանը ենթարկվի սպառնալիքների ու հարձակումների, մինչդեռ այլ երկրներ շարունակեն օգտվել նեղուցի անվտանգությունից, մանավանդ որ Իրանը վերահսկում է ջրային ուղու զգալի մասը:

Նա ասել է, որ հիմնականում ԱՄՆ-ն է մեղավոր էներգակիրների համաշխարհային գների աճի համար, ինչը պայմանավորված է Հորմուզի նեղուցում տիրող ներկայիս իրավիճակով: Նա պնդել է, որ Վաշինգտոնն անապահով իրավիճակ է ստեղծել Պարսից ծոցի և Հարավարևմտյան Ասիայի մի հատվածում (որը, ըստ նրա, սերտորեն փոխկապակցված տարածաշրջան է)՝ միևնույն ժամանակ ակնկալելով, որ այլ հատվածներում կապահովվեն անվտանգությունն ու բարօրությունը:

Գեներալը հավելել է, որ «Իրանի դեմ ամերիկա-իսրայելական ագրեսիան կշարունակի է՛լ ավելի մեծ ազդեցություն ունենալ համաշխարհային շուկաների վրա, իսկ էներգակիրների գները է՛լ ավելի կաճեն»:

Ակրամինիան հայտարարել է, որ Պարսից ծոցում ստեղծված իրավիճակից տուժած տարածաշրջանի երկրները պետք է դիմակայեն ԱՄՆ-ին և պատասխանատվություն պահանջեն այն պայմանների համար, որոնք նա ստեղծել է տարածաշրջանում: