Iran International․ ԱՄԷ-ն չեղարկել է Իրանի քաղաքացիների կացության և «ոսկե վիզաները»

Արաբական Միացյալ Էմիրությունները վերջին օրերին չեղարկել են երկրից դուրս գտնվող իրանցիների կացության վիզաները, ինչի հետևանքով նրանցից ոմանք արտերկրում հայտնվել են ծանր կացության մեջ՝ համաձայն տուժածներից Iran International-ի ստացած տեղեկությունների։

Իրանի քաղաքացիները պարզել են, որ իրենց վիզաներն անվավեր են ճանաչվել նախքան ԱՄԷ վերադառնալը, ինչը խոչընդոտել է նրանց կրկնակի մուտքը երկիր, Iran International-ին հայտնել են մի քանի տուժածներ։

Ավելի վաղ հաղորդվել էր նաև ԱՄԷ մեկնող Իրանի քաղաքացիների զբոսաշրջային վիզաների չեղարկման մասին։ Մի քանի հոգի պատմել են ուղևորությունների ժամանակ վիզաների հանկարծակի չեղարկումների մասին։

Իրանի մի բնակիչ պատմել է, որ պատերազմի սկսվելուց հետո ընտանիքի հետ Հնդկաստան մեկնելով՝ պարզել է, որ իր կացության թույլտվությունը չեղարկվել է, մինչդեռ իր ընտանիքի՝ ազգությամբ ոչ իրանցի անդամները դեռևս կարող էին վերադառնալ։ Մեկ ուրիշը նշել է, որ իր կացության թույլտվությունը, որը կապված էր 10-ամյա «ոսկե վիզայի» հետ, չեղարկվել է արտերկրում գտնվելու ժամանակ։

Լոնդոնում բնակվող և Միացյալ Թագավորության աշխատանքային վիզա ունեցող մի իրանցի ասել է, որ Դուբայ մեկնելուց առաջ պարզել է, որ ԱՄԷ-ում իր կացության թույլտվությունը չեղարկվել է։

Նշենք, որ Իրանի և ԱՄԷ-ի միջև հարաբերությունները սրվել են փետրվարի 28-ին ԱՄՆ-ի և Իսրայելի ռազմական արշավի սկսվելուց հետո։ Ի պատասխան այդ հարվածների՝ Իրանն սկսել է հարվածել Մերձավոր Արևելքի տարածաշրջանում ԱՄՆ-ի և Իսրայելի օբյեկտներին, որտեղ ներառված է նաևԱՄԷ-ի տարածքը։