Պատերազմը խլել է ոչ միայն կյանքեր, այլ նաև մշակույթ․ Թեհրանի երաժշտական դպրոցը վերածվել է փլատակների

Թեհրանում գործող Հոնիակ երաժշտական ակադեմիան, որը շուրջ 250 աշակերտների համար դարձել էր ապահով և ջերմ միջավայր, ամբողջությամբ ոչնչացվել է օդային հարվածի հետևանքով։ Դպրոցի հիմնադիր Համիդրեզա Աֆարիդեհի խոսքով՝ մարտի 23-ին իսրայելական հարվածը հասցվել է այն շենքին, որտեղ գտնվում էր դպրոցը․ այս մասին հայտնում է CNN-ը։ Թեև կենտրոնը նախապես փակվել էր և ներսում մարդիկ չեն եղել, ավերածությունները եղել են լիակատար։

Հարվածից հետո շենքը ծանր վնասվել է․ փլվել են պատերը, կոտրվել պատուհանները, իսկ ներսում եղած ողջ գույքը՝ երաժշտական գործիքներից մինչև տեխնիկա, վերածվել է ավերակների։ Աֆարիդեհը նշել է, որ տարիների աշխատանքի արդյունքը մեկ գիշերում անհետացել է՝ պատճառելով մոտ 42 հազար դոլարի վնաս։

Դեպքը նաև ցույց է տալիս պատերազմի լայն ազդեցությունը քաղաքացիական կյանքի վրա․ դպրոցը ոչ միայն կրթական կենտրոն էր, այլ նաև «երկրորդ տուն» իր սաների համար։ Այժմ հիմնադիրները կանգնած են վերականգնման լուրջ խնդիրների առաջ՝ առանց հստակ ֆինանսական աջակցություն ունենալու։