Իրանը կարող էր սխալ ներկայացնել խոցված ինքնաթիռը․ F-35-ի փոխարեն՝ F-15E

Իրանի կողմից ցուցադրված կործանված ինքնաթիռի բեկորները կարող են չպատկանել հինգերորդ սերնդի F-35-ին, ինչպես հայտարարվել էր նախապես։ Ինչպես հայտնում է TWZ-ը, հրապարակված լուսանկարների վերլուծությունը ցույց է տալիս, որ խոսքը, հավանաբար, ամերիկյան F-15E Strike Eagle կործանիչի մասին է։

Ամերիկյան պարբերականի տվյալներով՝ բեկորները, այդ թվում՝ ուղղահայաց կայունացուցիչի և թևի հատվածները, ավելի համապատասխանում են F-15E մոդելին։ Սակայն միևնույն ժամանակ նշվում է, որ լիարժեք հաստատում դեռ չկա, և չի բացառվում, որ այդ լուսանկարները կապված են ավելի վաղ միջադեպի հետ։

Ավելի վաղ Իրանի Իսլամական հեղափոխության պահապանների կորպուսը հայտարարել էր F-35 կործանիչի խոցման մասին, սակայն ԱՄՆ զինվորականները կասկածի տակ էին դրել այդ պնդումները՝ նշելով, որ հրապարակված տեսանյութերում կարող են երևալ ոչ թե հարվածի հետևանքներ, այլ ինքնաթիռի պաշտպանական միջոցների կիրառումը։