Իսլամաբադում սպասվող ԱՄՆ–Իրան բանակցությունները կարող են հետաձգվել․ նոր ամսաթիվ է նշվում

Իրանի և ԱՄՆ-ի ներկայացուցիչների միջև նախատեսվող բանակցությունները Պակիստանի մայրաքաղաք Իսլամաբադում, ամենայն հավանականությամբ, կկայանան ապրիլի 11-ին՝ նախապես նշված ամսաթվից մեկ օր ուշ։ Այս մասին հայտնում է Al Mayadeen հեռուստաալիքը՝ հղում անելով իր աղբյուրներին, իսկ թեմային անդրադարձել է նաև «Լենտա.ru»-ն։

Հեռուստաալիքի տվյալներով՝ իրանական պատվիրակության կազմում ընդգրկված են լինելու Ազգային անվտանգության բարձրագույն խորհրդի քարտուղար Մոհամմադ Բաղեր Զոլղադրին, խորհրդարանի նախագահ Մոհամմադ Բաղեր Գալիբաֆը, արտգործնախարար Աբբաս Արաղչին և նրա տեղակալ Մաջիդ Թախտ-Ռավանչին։ Նշվում է, որ բանակցությունները կարող են կարևոր փուլ դառնալ Վաշինգտոնի և Թեհրանի միջև հարաբերությունների կարգավորման գործընթացում։

Ավելի վաղ ԱՄՆ նախագահ Դոնալդ Թրամփը հայտարարել էր, որ համաձայնել է Իրանի հետ երկշաբաթյա հրադադարի՝ ընդգծելով, որ կողմերը մոտ են երկարաժամկետ խաղաղության համաձայնագրի կնքմանը։ Միևնույն ժամանակ Ռուսաստանի նախագահ Վլադիմիր Պուտինը իր ուղերձում Իրանի ղեկավարությանը ցանկացել էր հաղթահարել առաջացած դժվարությունները։