Իրանը հայտարարել է՝ թշնամու նավերը չեն անցնի Հորմուզի նեղուցով

Իրանի զինված ուժերի միացյալ հրամանատարությունը հայտարարել է, որ Պարսից ծոցի և Օմանի ծովի նավահանգիստները «կամ հասանելի են բոլորի համար, կամ ոչ մեկի», հաղորդում է պետական IRIB հեռուստառադիոընկերությունը։ Հայտարարության համաձայն՝ Իրանի Իսլամական Հանրապետության զինված ուժերը երկրի օրինական իրավունքների պաշտպանությունը համարում են բնական և իրավական պարտականություն, իսկ երկրի տարածքային ջրերում ինքնիշխանության իրականացումը՝ իրանական ժողովրդի բնական իրավունք։

Նշվում է, որ Իրանը կշարունակի ապահովել նեղուցի անվտանգությունը, և «թշնամու հետ առնչվող նավերը չեն ունեցել և չեն ունենա Հորմուզի նեղուցով անցնելու իրավունք»։ Միևնույն ժամանակ, մյուս նավերի անցումը թույլատրվելու է՝ Իրանի կողմից սահմանված կանոնների համաձայն։

Հայտարարության մեջ նաև ընդգծվում է, որ նույնիսկ պատերազմի ավարտից հետո Իրանը վճռականորեն կկիրառի Հորմուզի նեղուցի վերահսկման մշտական մեխանիզմ՝ հաշվի առնելով ազգային անվտանգության դեմ շարունակվող սպառնալիքները։ Իրանի զինված ուժերը հավելել են, որ ԱՄՆ-ի կողմից միջազգային ջրերում նավերի տեղաշարժի սահմանափակումները «ապօրինի են և հավասարազոր ծովահենության», և զգուշացրել, որ եթե նավահանգիստների անվտանգությունը վտանգվի, Պարսից ծոցի և Օմանի ծովի ոչ մի նավահանգիստ անվտանգ չի լինի։