Կիևի մերձակայքում հայտնաբերվել է Մոնակոյում տեղի ունեցած ահաբեկչության գործով կասկածյալի մարմինը. «Украинская правда»

Կիևի մերձակայքում հայտնաբերվել է Մոնակոյում ուկրաինացի գործարար Վադիմ Երմոլաևի դեմ իրականացված ահաբեկչության գործով կասկածվող կնոջ մարմինը։ Այդ մասին հայտնում է «Украинская правда» պարբերականը՝ հղում անելով ուկրաինական իրավապահ մարմիններում իր աղբյուրներին։

Հրապարակման համաձայն՝ կնոջ մարմինը հայտնաբերվել է հուլիսի 6-ի երեկոյան։ Նախնական տվյալներով՝ նա սպանվել է հրազենային կրակոցից և թաղվել Կիևի մերձակայքում։ Գործի շրջանակում արդեն ձերբակալվել է երկու կասկածյալ, որոնցից մեկը, ըստ աղբյուրների, Ուկրաինայի պաշտպանության նախարարության գլխավոր հետախուզական վարչության գործող սպա է, իսկ մյուսը՝ նախկին իրավապահ։

Հունիսի 29-ին Մոնակոյի բնակելի շենքերից մեկում տեղի էր ունեցել ինքնաշեն պայթուցիկ սարքի պայթյուն, որի հետևանքով ծանր վիրավորվել էին գործարար Վադիմ Երմոլաևը և նրա ուղեկից Աննա Նասոբինան, իսկ նրանց 13-ամյա որդին ստացել էր թեթև վնասվածքներ։ Ավելի ուշ France Info-ն հայտնել էր, որ հարձակման գլխավոր կասկածյալը Ուկրաինայի քաղաքացի է, որը դեպքից հետո փախել էր նախ Ֆրանսիա, ապա՝ Իտալիա։