Բրազիլիայի ԱԳՆ-ն չի բացառել երկրի տարածքում ԱՄՆ-ի ուժի կիրառման հնարավորությունը

Բրազիլիայի արտաքին գործերի նախարարությունը չի բացառել, որ ԱՄՆ-ը կարող է ռազմական ուժ կիրառել երկրի տարածքում այն բանից հետո, երբ Վաշինգտոնը PCC և CV հանցավոր խմբավորումներին ճանաչեց ահաբեկչական կազմակերպություններ։ Այդ մասին հայտնում է CNN Brasil-ը։

Բրազիլիայի արտգործնախարար Մաուրու Վիեյրան, պատասխանելով պատգամավորների հարցմանը, նշել է, որ նման սցենարը հնարավոր է։ Միաժամանակ նախարարությունում ընդգծել են, որ այդ որոշումը չի նպաստի երկու երկրների համագործակցության ամրապնդմանը, քանի որ մինչ այդ էլ Բրազիլիան և ԱՄՆ-ը համագործակցում էին կազմակերպված հանցավորության դեմ պայքարի ոլորտում։

Բրազիլիայի իշխանությունները պաշտոնական արձագանք չեն ներկայացրել Վաշինգտոնի որոշմանը՝ նշելով, որ այն ընդունվել է միակողմանի կարգով և առանց ԱՄՆ-ի պաշտոնական ծանուցման։ Մայիսի վերջին ԱՄՆ-ը PCC և CV խմբավորումներին ներառել էր օտարերկրյա ահաբեկչական կազմակերպությունների ցանկում, իսկ որոշումն ուժի մեջ էր մտել հուլիսի 5-ին։ Դրանից հետո ԱՄՆ ֆինանսների նախարարությունը նաև պատժամիջոցներ էր սահմանել Բրազիլիայում գտնվող երկու անձի և երեք ընկերության նկատմամբ՝ նրանց մեղադրելով այդ խմբավորումներից մեկի հետ կապերի համար։