Ուկրաինան հայտնել է Մոնակոյի ահաբեկչության գործով կասկածյալի երկիր մուտք գործելու մանրամասները

Ուկրաինայի պետական սահմանապահ ծառայությունը հայտարարել է, որ Մոնակոյում ուկրաինացի գործարար Վադիմ Երմոլաևի դեմ մահափորձի գործով կասկածվող կինը Ուկրաինա է մուտք գործել օրինական հիմքերով։ Այդ մասին հայտնում է «Общественное»-ը՝ հղում անելով գերատեսչությանը։

Սահմանապահ ծառայության տվյալներով՝ կասկածյալը հուլիսի 1-ին հատել է Ուկրաինայի պետական սահմանը սահմանային անցակետերից մեկով, և այդ պահին իրավապահները որևէ իրավական հիմք չեն ունեցել նրան ձերբակալելու կամ երկիր մուտքը մերժելու համար։

Հունիսի 29-ին Մոնակոյում բնակելի շենքի մոտ տեղի ունեցած ինքնաշեն պայթուցիկ սարքի պայթյունի հետևանքով ծանր վնասվածքներ էին ստացել ուկրաինացի գործարար Վադիմ Երմոլաևը և նրա ուղեկից Աննա Նասոբինան, իսկ նրանց 13-ամյա որդին ստացել էր թեթև վնասվածքներ։ Դեպքը համարվում է Մոնակոյի պատմության մեջ առաջին նման ահաբեկչական հարձակումը։

Հուլիսի 7-ին կասկածյալի մարմինը հայտնաբերվել էր Կիևի մերձակայքում՝ հողի տակ թաղված վիճակում։ Նրա որոնումներն իրականացնում էր Ինտերպոլը։ Գործի շրջանակում ձերբակալվել են Ուկրաինայի պաշտպանության նախարարության գլխավոր հետախուզական վարչության գործող սպա և իրավապահ մարմինների նախկին աշխատակից։