Փորձագետը կասկածի տակ է դրել Ուկրաինայում Patriot հրթիռների արտադրության հնարավորությունը

Pacific Forum վերլուծական կենտրոնի ավագ գիտաշխատող Ուիլյամ Ալբերկը հայտարարել է, որ Ուկրաինայում Patriot զենիթահրթիռային համալիրների հրթիռների արտադրության գործարան կառուցելը գործնականում անհնար կլինի։ Այդ մասին նա ասել է Bloomberg-ին տված հարցազրույցում։

Նրա խոսքով՝ եթե նման նախագիծ իրականացվի, ապա ավելի նպատակահարմար կլինի գործարանը կառուցել Լեհաստանում, քանի որ Ուկրաինայում այն անմիջապես կդառնա առաջնային ռազմական թիրախ։

Bloomberg-ը նաև նշում է, որ նույնիսկ արտադրության մեկնարկը չի ապահովի Ուկրաինայի զինանոցների արագ համալրումը։ Գործակալության գնահատմամբ՝ նման արտադրության կազմակերպումը կարող է տարիներ պահանջել՝ բարդ տեխնոլոգիաների և մասնագետների պատրաստման անհրաժեշտության պատճառով։

Ավելի վաղ ԱՄՆ նախագահ Դոնալդ Թրամփը հայտարարել էր, որ Վաշինգտոնը պատրաստ է Ուկրաինային տրամադրել Patriot համակարգերի արտադրության համապատասխան լիցենզիաներ։