Հայկական ձկնամթերքի արտահանումը դեպի ԵՄ մտնում է գործնական փուլ

Հայաստանը մոտ է դեպի Եվրոպական միության շուկա ձկնամթերքի արտահանման գործնական փուլին։ Այս մասին հայտնել է Սննդամթերքի անվտանգության տեսչական մարմնի (ՍԱՏՄ) ղեկավար Տիգրան Պետրոսյանը։

Նրա խոսքով՝ անցած տարի հայտարարվելուց հետո, որ ԵՄ երկրները բաց են հայկական ձկնամթերքի համար, ՍԱՏՄ-ն և Էկոնոմիկայի նախարարությունը համատեղ իրականացրել են անհրաժեշտ նախապատրաստական աշխատանքները և մշակել համապատասխան քաղաքականությունը։

«Այս պահին արդեն պատրաստ ենք անցնել իրական արտահանման փուլին։ Ոլորտում գործող տնտեսությունների շուրջ 97 տոկոսը պատրաստ է այդ գործընթացին»,- նշել է Պետրոսյանը։

ՍԱՏՄ ղեկավարի գնահատմամբ՝ այժմ հիմնական հարցը բիզնեսի հետաքրքրվածությունն է՝ արդյոք արտադրողները կցանկանան իրենց արտադրանքը ներկայացնել եվրոպական շուկաներում։

Անդրադառնալով տնտեսությունների պատրաստվածությանը՝ նա ընդգծել է, որ խնդիրները կապված չեն արտադրանքի որակի հետ։ Խոսքը հիմնականում տեխնիկական բնույթի թերությունների մասին է, օրինակ՝ որոշ տնտեսություններում տարածքների ցանկապատման բացակայության, որոնք հնարավոր է կարճ ժամանակում շտկել։

Պետրոսյանի տեղեկացմամբ՝ արտահանման գործընթացն արդեն մտնում է գործնական փուլ։ Մեկ ընկերություն արդեն պաշտոնապես դիմել է ՍԱՏՄ-ին, իսկ ևս հինգ կազմակերպություն դիմել է Էկոնոմիկայի նախարարություն՝ սպասելով անհրաժեշտ ստուգումների և ընթացակարգերի մեկնարկին։

«Վստահ եմ, որ առաջին հաջող արտահանումներից հետո հետաքրքրությունը կաճի, քանի որ բիզնեսը կհամոզվի, որ գործընթացը բարդություններ չի առաջացնում»,- նշել է ՍԱՏՄ ղեկավարը՝ կանխատեսելով, որ առաջիկայում արտահանման ծավալներն էապես կավելանան։