Իրանում սկանդալ է ծագել Ահմադինեժադի կողմից Չավեսի մորը գրկելու պատճառով

Իրանի իսլամական հանրապետության նախագահ Մահմուդ Ահմադինեժադը, ով ժամանել էր Վենեսուելա իր ընկեր և դաշնակից Ուգո Չավեսի հրաժեշտի արարողությանը մասնակցելու համար, Իրանում սուր քննադատության է ենթարկվել իսլամի նորմերին ոչ հարիր վարմունքի համար: Բանն այն է, որ ԶԼՄ-ներում հայտնվել է լուսանկար, որում Իրանի առաջնորդ Ահմադինեժադը գրկել է հանգուցյալ նախագահ Ուգո Չավեսի մորը` էլենա Ֆրիասին` հայտնելով իր ցավակցանքը. գրում է Korrespondent-ը:

Մուսուլման տղամարդուն մերձավոր հարազատ չհանդիսացող կնոջը գրկելը կրոնի մոլեռանդների կողմից քննադատության է արժանացել: «Երկրի ղեկավարի նման արարքը չի համապատասխանում իսլամի մորմերին, չի կարելի թույլ տալ, որ նման այլասերված բարքերը տարածվեն մեր երկրում»,- հայտարարել է Իրանի հոգևոր առաջնորդ այաթոլլահ Ալի Խամենեիի համախոհ, մեջլիսի պատգամավոր Մուհամմեդ Դեհգանը:

Երկրի պահպանողական զանգվածները զայրացած են Իրանի նախագահի` երկրում եռօրյա սուգ հայտարարելու որոշմամբ: Նրանք նաև պղծություն են համարել Ահմադինեժադի արած համեմատությունը, որտեղ նա Չավեսին համեմատել է Հիսուսի հետ: