Սարկոզին օրեկան 15 հազար դոլար է ծախսում ուտելու վրա

Ելիսեյան պալատն օրեկան 15 հազար դոլարի չափով գումար է ծախսում Ֆրանսիայի նախագահ Նիկոլա Սարկոզիի ուտելիքի և խմիչքի վրա, հայտնում է լոնդոնյան «Սանդի թայմս» շաբաթաթերթը։

«Ֆրանսիայի նախագահները հայտնի են ճոխության հանդեպ ունեցած իրենց հակումով։ Նիկոլա Սարկոզին բացառություն չէ։ Նա ունի 121 ավտոմեքենաներից բաղկացած ավտոպարկ՝ Ելիսեյան պալատի տակ գտնվող ավտոկայանատեղիում, իսկ ուտելիքի և խմիչքի վրա օրեկան ծախսում է 10 հազար ֆունտ ստեռլինգ (15 հազար դոլար)»,– գրում է պարբերականը։ Դա ավելին է, քան բրիտանական թագավորական ընտանիքի ծախսած գումարը։

Չնայած այն հանգամանքին, որ Սարկոզին համեղ ուտելու և ալկոհոլ օգտագործելու հակում չունի, բայց հայտնի է, որ ֆրանսիական հանրապետության նախագահը քաղցրեղենի սիրահար է։ Մինչ Կարլա Բրունիի հետ ամուսնությունը, հայտնի է, որ նա կերել է մեծ քանակությամբ շոկոլադ և կոնֆետներ։ Սակայն 57-ամյա Նիկոլա Սարկոզիի կինն ընտանիքում բավականին խիստ սահմանափակումներ է սահմանել քաղցրեղենի օգտագործման վրա։