Արևմուտքը պետք է Ռուսաստանի հետ համատեղ լուծի արմատական իսլամի հիմնախնդիրը. Թոնի Բլեր

Աշխարհ 24 Ապրիլ, 2014 3:38

Արևմուտքի երկրները պետք է մոռանան Ռուսաստանի հետ տարաձայնություններն Ուկրաինայի հարցի շուրջը և զբաղվեն ամբողջ աշխարհին սպառնացող իսլամական ծայրահեղականության հիմնախնդրի լուծմամբ: Այս կարծիքը հայտնել է Մեծ Բրիտանիայի նախկին վարչապետ, Մերձավոր Արևելքի հարցերով հատուկ դեսպանորդ Թոնի Բլերը:

«Բոլորովին վերջերս Ուկրաինան երկրորդ պլան մղեց մերձավորարևելյան թեմատիկան: Բայց Մերձավոր Արևելքը չի կորցրել կարևորությունը: Այն, ինչ այնտեղ տեղի է ունենում, նախկինի պես մեծ սպառնալիք է ներկայացնում համաշխարհային անտվանգությանը: Տարածաշրջանը, ինչպես նաև այն տարածաշրջանները, որոնք գտնվում են դրա սահմաններից դուրս՝ Պակիստանը, Աֆղանստանը, Հյուսիսային Աֆրիկան, ներքաշված են հարատև անկայունության մեջ: Ճգնաժամի գագաթին են գտնվում արմատական իսլամը և իսլամի քաղաքականացված հայացքները, գաղափարախոսություն, որը աղճատում և թաքցնում է իսլամի ճշմարիտ կանխադրույթները»,- ասված է նախկին վարչապետի ճառում, որով նա ծրագրում է ապրիլի 23-ին ելույթ ունենալ Լոնդոնում:

Նրա կարծիքով՝ արմատական իսլամից բխող հարաճուն սպառնալիքը պահանջում է անհապաղ և համընդհանուր ուշադրություն: Արմատականներն ընդունակ են ապակայունացնելու հասարակությունները և ոչնչացնելու գլոբալացման արդի դարաշրջանի նվաճումները:

«Մենք պետք է ընդունեք հիմնախնդրի գոյությունը և, անկախ մեր մյուս դժվարություններից, պատրաստ լինենք մերձենալու և համագործակցելու Արևելքի, մասնավորապես, Ռուսաստանի և Չինաստանի հետ»,- ասել է Բլերը, հաղորդել է ՌԻԱ Նովոստի գործակալությունը: