Ուկրաինացիների ավելի քան 70 տոկոսը պաշտպանում է պետական կառուցվածքի ունիտար ձեւը

Ուկրաինայի բնակիչների գրեթե 71 տոկոսը պաշտպանում է պետական կառուցվածքի ունիտար ձևը, դաշնայնացման օգտին հանդես է գալիս 19 տոկոսից պակասը:

Այդ մասին վկայում են «Ուկրաինա. Նախագահական ընտրություններ-2014, ապրիլ» հետազոտության տվյալները, որն Ուկրաինայի ընտրողների կոմիտեի պատվերով անցկացրել է սոցիալական և մարկետինգային հետազոտությունների ՍՈՑԻՍ կենտրոնը, Կիևի սոցիոլոգիայի միջազգային ինստիտուտը, «Ռեյտինգ» սոցիոլոգիական խումբը և Ռազումկովի կենտրոնը: Հետազոտության արդյունքներն ապրիլի 23-ին ներկայացվել են «Ինտերֆաքս-Ուկրաինա» գործակալությունում կայացած մամուլի ասուլիսում:

Հարցին, թե ուսումնասիրության մասնակիցներն Ուկրաինայի կառուցվածքի որ ձևի կողմնակից են իրենց համարում, 70,9 տոկոսը նշել է ունիտար պետությունը, 18,7 տոկոսը՝ դաշնայինը, 10,4 տոկոսը հրաժարվել են պատասխանել կամ դեռևս չեն ճշտել՝ որ ձևին են տալիս նախապատվությունը:

Հարցումն ապրիլի 9-ից 16-ն անցկացվել է Ուկրաինայի բոլոր տարածաշրջաններում. դրան մասնակցել են 18-ից բարձր տարիքի քաղաքացիները: Հարցախույզին մասնակցել է 6200 մարդ: Վիճակագրական սխալանքը չի գերազանցում 0,8 տոկոսը: