Օբաման կրկին չի օգտագործել «ցեղասպանություն» բառը

ԱՄՆ նախագահ Բարաք Օբաման 2014թ. ապրիլի 24-ին ամենամյա ուղերձ է հղել հայ ժողովրդին: Նա «Հայոց ցեղասպություն» եզրը չի օգտագործել և կրկին 1915թ. իրադարձություններն անվանել է Մեծ Եղեռն: Ուղերձում նշվում է.

«Այսօր մենք հիշատակում ենք Մեծ Եղեռնը և հարգանքի տուրք մատուցում նրանց, ովքեր զոհ գնացին 20-րդ դարի սարսափելի վայրագություններից մեկին: Մենք սոսկումով ենք հիշում 95 տարի առաջ տեղի ունեցածը, երբ 1,5 միլիոն հայեր կոտորվեցին և մահվան երթի դատապարտվեցին Օսմանյան կայսրության վերջին օրերին: Մենք սգում ենք կորուսյալ կյանքերի և այդ տառապանքները կրած տղամարդկանց, կանանց և երեխաների համար: Մենք միանում ենք Միացյալ Նահանգներում և ողջ աշխարհում այն միլիոնավորներին, ովքեր ոգեկոչում են հիշատակը: Մենք հիշում ենք միացյալ հանձնառությունը' ապահովելու, որ նման մութ էջեր մարդկության պատմության մեջ երբեք չկրկնվեն:

Ես հետևողականորեն հայտարարել եմ իմ տեսակետը 1915թ. դեպքերի կապակցությամբ, և իմ տեսակետը չի փոխվել: Այս փաստերի ամբողջական, անկեղծ և արդար ճանաչումը բոլորիս շահերից է բխում: Ժողովուրդներն ու ազգերը ավելի են ուժեղանում և ավելի արդար ու համերաշխ ապագայի հիմք են ստեղծում' ճանաչելով ու հաշվի նստելով անցյալի ցավալի դեպքերի հետ: Մենք շարունակում ենք սերտել այս դասը Միացյալ Նահանգներում, քանզի մենք ձգտում ենք հաշտեցում գտնել մեր պատմության որոշ մութ էջերի համար: Մենք խրախուսում ենք այն հայերին և թուրքերին, ովքեր անցել են այս ճանապարհով և կոչ ենք անում շարունակել այդպես' վայելելով իրենց կառավարությունների և իմ աջակցությունը:

Մենք հպարտությամբ ենք փաստում ամերիկացիների նվիրատվությամբ ստեղծված Սիրիական և հայ օգնության ամերիկյան հիմնադրամի մարդասիրական ջանքերը, որը փրկել է անթիվ հայերին և այլ խոցելի համայնքներին, որոնք տեղահանվել են 1915-ին:

1915թ. հայերի կորսված կյանքերի համար հիշատակության հետ մեկտեղ մենք ոգեշնչված ենք հայ ժողովրդի արտակարգ քաջությամբ և մեծ ճկունությամբ, որով նրանք դիմակայել են նման հսկայական մարտահրավերներին ու տառապանքին: Ես հիացած եմ ամերիկահայերի անհամար ներդրումների համար, որ նրանք կատարել են ամերիկյան սոցիալական, մշակութային, համայնքային կյանքում: Մենք ընդհանուր հանձնառություն ունենք' ապահովելու հայ ժողովրդի' ժողովրդավար, խաղաղ ու ծաղկուն ապագայի կերտումը:

Այսօր մեր մտքերն ու աղոթքները հայերի հետ են ամենուր, քանի որ մենք ոգեկոչում ենք Մեծ Եղեռնը, հարգում զոհերի հիշատակը, վերահաստատում մեր տևական հանձնառությունը Հայաստանի ժողովրդի և նման վայրագությունների կրկնությունը բացառելու համար դրանք դատապարտելու սկզբունքի հանդեպ»: