ԵՄ-ն «Արևելյան գործընկերության» նախագծերի ֆինանսավորումն ավելացրել է մինչև 2,5 միլիարդ եվրո

Եվրամիությունը 2010-ից մինչև 2013 թվականն «Արևելյան գործընկերության» ծրագրի շրջանակներում նախագծերի ֆինանսավորումն ավելացրել է մինչև 2,5 միլիարդ եվրո: Այս մասին ասված է Եվրահանձնաժողովի ղեկավար Ժոզե Մանուել Բառոզուի հայտարարության մեջ, որը նրա անունից ընթերցել է ընդլայնման և հարևանության քաղաքականության հարցերի եվրակոմիսար Շտեֆան Ֆյուլեն՝ գործընկերության 5-րդ տարեդարձի առթիվ Պրահայում կայացած հանդիպման ժամանակ:

«Ընդհանուր առմամբ մենք մինչև 2,5 միլիարդ եվրո ավելացրել ենք երկկողմ և տարածաշրջանային նախագծերի ֆինանսական օժանդակումը, որոնք միտված են 2010-ից մինչև 2013 թվականը գործընկերության նպատակներին հասնելուն»,- ասված է Բառոզուի հայտարարության մեջ: Նա նաև նշել է, որ Եվրամիության առաջիկա 7 տարվա բյուջեն երաշխավորում է, որ Բրյուսելը կկարողանա օժանդակել Արևելյան Եվրոպային:

«Մենք հուսով ենք ամբողջությամբ ստորագրել Ասոցացման և ազատ առևտրի համաձայնագիրն Ուկրաինայի, Վրաստանի և Մոլդովայի հետ և առաջընթացի հասնել Հայաստանի և Ադրբեջանի հետ համատեղ նախագծերում»: Բացի դրանից, Եվրահանձնաժողովի ղեկավարը նշել է, որ Եվրամիությունը մտադիր է շարունակել աշխատանքը Բելառուսի հետ, հաղորդել է ԻՏԱՌ-ՏԱՍՍ-ը: