Անհետացած Boeing 777-ի որոնողական աշխատանքները կտևեն տարիներ

Արդեն 1 ամսից ավելի անհետացած մալայզիական Boeing 777 ինքնաթիռի որոնողական աշխատանքները, ըստ Պենտագոնի, տարիներ կտևեն։ Այս մասին հայտնում է ria.ru-ն՝ վկայակոչելով Reuters գործակալությանը:

Նշվում է, որ ԱՄՆ-ի պաշտպանության նախարարությունը նման եզրակացության է հանգել՝ հիմնվելով այն բանի վրա, որ Bluefin-21 ստորջրյա սարքի միջոցով օդանավի բեկորների որոնողական աշխատանքները որևէ արդյունք չեն տվել։

Վերջերս  Հնդկական օվկիանոսում Malaysia Airlines ավիաընկերությանը պատկանող Boeing 777 ինքնաթիռի որոնողական աշխատանքներն իրականացնող թիմը սկսել է դիտարկել կարծես թե անհնարին թվացող մի վարկած: Ըստ այդ վարկածի՝ օդանավը հնարավոր է` ոչ թե կործանվել է Հնդկական օվկիանոսում, այլ «վայրէջք» է կատարել ինչ-որ մի տեղ:

Հիշեցնենք, որ Մալազիայի Կուալա Լումպուր քաղաքից դեպի Պեկին չինական China Southern Airlines ընկերության հետ համատեղ չվերթ կատարող 227 ուղևորով և անձնակազմի 12 անդամով ինքնաթիռը ռադարներից անհետացել է մարտի 8-ին: Վերջին կապի ընթացքում ինքնաթիռը գտնվել է թագավորության ափերից 220 կմ արևելք: Ինքնաթիռի անհետացման վայրում եղանակային պայմանները լավ են եղել, բացի այդ, փորձառու օդաչուների կողմից ղեկավարվող ինքնաթիռն անհետանալուց առաջ ամբողջական ստուգում է անցել: