Համացանցն ԱՄՆ-ի Կենտրոնական հետախուզական վարչության հատուկ նախագիծն է. Պուտին

Ինչպես տեղեկացնում է itar-tass-ը, ՌԴ-ի նախագահ Վլադիմիր Պուտինն անհրաժեշտ է համարում ազգային ինտերնետային խոշոր ռեսուրսների տեղակայումը Ռուսաստանի տարածքում և որ կարծում է, որ համացանցն ԱՄՆ-ի Կենտրոնական հետախուզական վարչության հատուկ նախագիծն է: ՌԴ-ի նախագահն այդ մասին հայտարարել է Սանկտ Պետերբուրգում անցկացված մեդիաֆորումի ժամանակ:

«Ներկայումս տվյալների հիմնական հոսքն ընթանում է ԱՄՆ-ում տեղակայված սերվերների միջոցով, ուր ամեն ինչ վերահսկողության տակ է: Համացանցն առաջացել է` որպես ԱՄՆ-ի ԿՀՎ-ի հատուկ նախագիծ և այդպես էլ զարգանում է»: Պուտինը հույս է հայտնել, որ ռուսական ինտերնետը կզարգանա բավական ինտենսիվ ու արագ և կապահովի Ռուսաստանի շահերը:

Ավելի վաղ Քերին արձագանքել է Ռուսաստանի նախագահ Վլադիմիր Պուտինի հայտարարությանը, որը, ապրիլի 24-ին Սանկտ Պետերբուրգում ելույթ ունենալով մեդիահամաժողովում, ասել է, որ համացանցը «Կենտրոնական հետախուզական վարչության հատուկ նախագիծն է»:

«Ռուսաստանի ղեկավարներն ավելի ու ավելի վրդովեցուցիչ հայտարարություններ են անում, որպեսզի արդարացնեն իրենց գործողությունները, օրինակ, որ ԿՀՎ-ն է հորինել համացանցը, որպեսզի վերահսկի աշխարհը կամ որ շենքերը գրաված և մինչև ատամները զինված ու միանգամայն նոր զինվորական հագուստով և բանակային կարգապահություն պահպանող անձինք սոսկ տեղացի ակտիվիստներ են, որոնք ձգտում են իրականացնել իրենց օրինական իրավունքները: Դա անհեթեթություն է, դա նկարագրելու համար այլ բառեր գոյություն չունեն»,- հավելել է նա:

Հիշեցնենք, որ Ռուսաստանում կարող են արգելափակել օտարերկրյա առցանց ծառայությունները, ինչպես օրինակ Skype-ը և Gmail-ը, եթե նրանք չպահպանեն օգտատերերի մասին տվյալները երկրի տարածքում: Այս մասին ասվում է համապատասխան օրենքում, որը Պետդուման ընդունել է «հակաահաբեկչական փաթեթի» շրջանակում: