Պուտինը Մերկելի հետ հեռախոսազրույցի ընթացքում քննարկել է Ուկրաինայում ստեղծված իրադրությունը

Ռուսաստանի նախագահ Վլադիմիր Պուտինը ԳՖՀ-ի կանցլեր Անգելա Մերկելի հետ ունեցած հեռախոսազրույցի ընթացքում «խստիվ դատապարտել է Ուկրաինայի հարավ-արևելքում խաղաղ քաղաքացիների դեմ զինված ուժեր օգտագործելու Կիևի ռեժիմի փորձերը»:

«Պուտինը և Մերկելը կարծիքներ են փոխանակել Ուկրաինայում ստեղծված օրհասական իրադրության շուրջ, այդ թվում՝ հաշվի առնելով այն, որ Կիևի իշխանությունները չեն ցանկանում կատարել Ժնևի ապրիլի 17-ի պայմանավորվածությունները»:

«Պուտինը և Մերկելն ընդգծել են Ռուսաստանի, Եվրամիության և Ուկրաինայի ներկայացուցիչների մասնակցությամբ գազի մատակարարումների անվտանգության շուրջ շուտափույթ բանակցություններ վարելու կարևորությունը»,-նշել են մամուլի ծառայությունում:

Կրեմլում ասել են, թե «քննարկվել են նաև այն հարցերը, որոնք վերաբերում են Ուկրաինայում Եվրոպայի անվտանգության և համագործակցության կազմակերպության (ԵԱՀԿ) մոնիթորինգային առաքելության գործունեությանը»:

Հեռախոսազրույցը կայացել է գերմանական կողմի նախաձեռնությամբ:

Ավելի վաղ Ռուսաստանի արտաքին գործերի նախարար Սերգեյ Լավրովը հայտարարել է, որ Կիևի իշխանությունները կոպտորեն խախտում են ժնևյան համաձայնությունները և պետք է առաջին քայլերն անեն հակամարտության ապաէսկալացման համար: Ռուսաստանի ԱԳ նախարարության տարածած հայտարարության մեջ նշվում է, որ ԱՄՆ-ը պետք է ազդի Ուկրաինայի ղեկավարության վրա և դրդի Կիևին դադարեցնելու ուժային գործողությունը երկրի հարավ-արևելքում:

Իսկ նախագահ Պուտինը նախազգուշացրել է, որ Ուկրաինայի արևելքում այդ երկրի իշխանությունների կողմից բանակի օգտագործումը «հետևանքներ կունենա»:

ՌԴ-ի պաշտպանության նախարար Սերգեյ Շոյգուն ապրիլի 24-ին հայտարարել է, որ Ուկրաինայի հետ սահմանակից շրջաններում զորավարժություններ են սկսվել Հարավային և Արևմտյան ռազմական օկրուգների զորամիավորումների մասնակցությամբ:

Իր հերթին ՄԱԿ-ին առընթեր Ռուսաստանի մշտական ներկայացուցիչ Վիտալի Չուրկինը «Ռոսիա 1» հեռուստաալիքի եթերում հայտարարել է, որ Ուկրաինայի հարավ-արևելքում իրադարձությունների վատագույն զարգացման դեպքում Մոսկվան կհիշի այդ հանրապետության տարածքում ՌԴ-ի զինված ուժերի օգտագործման վերաբերյալ Դաշնության խորհրդի թույլտվության մասին: «Այդ հնարավորությունը մենք միշտ ունենք, բայց, իհարկե, ցանկալի չէր լինի»,- նշել է նա՝ հավելելով, որ Ուկրաինայի հարավ-արևելքում բռնությունների շարունակվելու դեպքում Ռուսաստանը ՄԱԿ-ի Անվտանգության խորհրդի արտահերթ նիստ կհրավիրի, հաղորդել է ԻՏԱՌ-ՏԱՍՍ-ը: