Ուկրաինայի դաշնայնացման կողմնակիցները Լուգանսկը հռչակել են «ժողովրդական հանրապետություն»

Լուգանսկում դաշնայնացման կողմնակիցներն ապրիլի 27-ին անցկացված հանրահավաքի ժամանակ հայտարարել են «Լուգանսկի ժողովրդական հանրապետության» ստեղծման մասին: Այս մասին հայտնում է itar-tass-ը:

«Մենք հայտարարում ենք  «Լուգանսկի ժողովրդական հանրապետության» ստեղծման մասին, մենք արդարության կողմնակիցներն ենք, ովքեր պայքարում են հանուն խաղաղության»,- հայտնել են ռուսամետ ակտիվիստները:

«Լուգանսկի մարզի տարածքային գրամադաների, քաղաքական կուսակցությունների և հասարակական կազմակերպությունների ներկայացուցիչները հռչակում են «Լուգանսկի ժողովրդական հանրապետություն» ինքնիշխան պետության ստեղծումը»,- ասված է փաստաթղթում:

Բացի այդ, միջոցառմանը հրապարակվել է մայիսի 11-ին պլանավորվող հանրաքվեի հարցը՝ «Պաշտպանում եք դուք արդյոք Լուգանսկի ժողովրդական հանրապետության պետական ինքնիշխանության հռչակման ակտը»: Նաև հայտարարվել է, որ «Կիևի ոչ լեգիտիմ իշխանությունների կողմից ագրեսիվ գործողությունների դեպքում» «Լուգանսկի ժողովրդական հանրապետությունը» մտադիր է դիմել Ռուսաստանին՝ խաղաղապահ ուժեր մտցնելու խնդրանքով:

Հիշեցնենք, Ղրիմի՝ Ռուսաստանին միանալուց հետո, Ուկրաինայի հարավ-արևելյան որոշ շրջաններ ևս ցանկություն են հայտնել անկախանալ այդ երկրից ու ներառվել ՌԴ կազմում։ Արդյունքում բախումներ են տեղի ունեցել իրավապահների ու ցուցարարների միջև։