Շվեյցարիան ԵԱՀԿ-ի մշտական խորհրդի հատուկ նիստ է գումարում՝ քննարկելու Ուկրաինայի իրադրությունը

Շվեյցարիան, որը ներկայումս նախագահում է Եվրոպայի անվտանգության և համագործակցության կազմակերպությունը (ԵԱՀԿ), հայտարարել է մշտական խորհրդի հերթական հատուկ նիստի գումարման մասին: Ինչպես ԻՏԱՌ-ՏԱՍՍ-ին հայտնել է ԵԱՀԿ-ին առընթեր շվեյցարական առաքելության մամուլի քարտուղար Ռոլանդ Բլեսը, հիմնական թեմաները կդառնան Ուկրաինայի իրադրությունը և կազմակերպության գործունեությունը երկրի իրադրության կայունացման ուղղությամբ:

Խորհրդի նիստի գլխավոր թեմաներից մեկը, ամենայն հավանականությամբ, կդառնա նաև այն իրադրությունը, որը կապված է անցյալ շաբաթվա վերջին Սլավյանսկի մոտ ԵԱՀԿ-ի մի քանի երկրների անզեն զինվորական դիտորդների ձերբակալման հետ: Նրանք Կիևի իշխանությունների հրավերով Ուկրաինայի տարածքում էին գտնվում ռազմական ոլորտում վստահության ամրապնդման միջոցառումների վերաբերյալ Վիեննայի փաստաթղթի նորմերին համապատասխան: Դրա հետ մեկտեղ զինվորական մասնագետներից ութը բուն ԵԱՀԿ-ն չէին ներկայացնում, այլ Ուկրաինա էին ուղարկվել իրենց երկրների՝ Գերմանիայի, Դանիայի, Լեհաստանի, Չեխիայի և Շվեդիայի պաշտպանական գերատեսչությունների կողմից: Շվեդիայից դիտորդը, որը տառապում է շաքարախից, ապրիլի 27-ին ազատ է արձակվել առողջական վիճակի կապակցությամբ:

Ժնևի պայմանավորվածությունների համաձայն, որոնք ձեռք են բերվել Ռուսաստանի, ԱՄՆ-ի, Եվրամիության և Ուկրաինայի արտաքին քաղաքական գերատեսչությունների ղեկավարների կողմից, ԵԱՀԿ-ն պետք է դառնա Ուկրաինայի իրադրության կարգավորմանն աջակցող գլխավոր գործիքներից մեկը: Այդ աշխատանքն իրականացվելու է նաև կազմակերպության հատուկ մոնիթորինգային առաքելության աշխատակիցների կողմից, որի թվաքանակը պլանավորվում է արդեն առաջիկայում հասցնել հնարավոր առավելագույն ցուցանիշին՝ 500-ի, հաղորդել է ԻՏԱՌ-ՏԱՍՍՍ-ը: