Ճապոնիան հայտարարել է Ռուսաստանի նկատմամբ նոր պատժամիջոցներ սահմանելու մասին

Ճապոնիայի կառավարությունն ապրիլի 29-ին հայտարարել է Ռուսաստանի նկատմամբ լրացուցիչ պատժամիջոցներ սահմանելու մասին՝ Ուկրաինայի շուրջն ստեղծված իրադրության առնչությամբ: Դրանք նախատեսում են մուտքի այցագրերի հանձնման ժամանակավոր դադարեցում ՌԴ-ի պաշտոնական կառույցների 23 ներկայացուցիչների և այլ անձանց: Նրանց ցուցակը կհրապարակվի ավելի ուշ:

Ճապոնիան պատժամիջոցները սահմանում է այն կոլեկտիվ որոշումների կատարման շրջանակներում, որոնք ընդունել են արդյունաբերապես զարգացած յոթ առաջատար երկրների ղեկավարները:

Ուկրաինայի իրադարձությունների կապակցությամբ ՌԴ-ի դիրքորոշման պատճառով ապրիլի 28-ին Ռուսաստանի նկատմամբ պատժամիջոցների ընդլայնման մասին հայտարարել են ԱՄՆ-ը և Եվրամիությունը:

ՌԴ-ի դեմ պատժամիջոցներն ընդլայնելու մասին հայտարարել է նաև Կանադան: Երկրի կառավարության ղեկավար Սթիվեն Հարփերի խոսքով՝ նոր պատժամիջոցների գործողության տակ են հայտնվում ռուսաստանցի ինը պաշտոնատար անձինք և երկու բանկ: Կանադական սև ցուցակի ֆիգուրանտների թվում են ՌԴ-ի նախագահի վարչակազմի ղեկավարի առաջին տեղակալ Վյաչեսլավ Վոլոդինը, ՌԴ-ի կառավարության նախագահի տեղակալ Դմիտրի Կոզակը, Պետդումայի պատգամավորներ Ալեքսեյ Պուշկովը, Ալեքսանդր Բաբակովը և Վլադիմիր Ժիրինովսկին, ինչպես նաև գործարարներ Արկադի և Բորիս Ռոտենբերգները, հաղորդել է ԻՏԱՌ-ՏԱՍՍ-ը: