ԵՄ-ն հրապարակել է այն 15 անձանց ցուցակը, որոնց դեմ պատժամիջոցներ են սահմանվել

Աշխարհ 29 Ապրիլ, 2014 16:50

Եվրամիությունը Ռուսաստանի դեմ պատժամիջոցների ցուցակում ընդգրկել է ևս 15 մարդու, որոնց թվում են՝ փոխվարչապետ Դմիտրի Կոզակը, ՌԴ զինուժերի գլխավոր շտաբի պետ Վալերի Գերասիմովը և պետական հետախուզական վարչության (ՊՀՎ) պետ Իգոր Սերգունը: Այդ մասին ասված է Եվրամիության պաշտոնական հանդեսում:

Ցուցակում ներառվել են նաև Ղրիմում Ռուսաստանի նախագահի մշտական ներկայացուցիչ Օլեգ Բելավենցևը, Ղրիմի գործերի նախարար Օլեգ Սավելևը, Պետդումայի փոխխոսնակներ Լյուդմիլա Շվեցովան և Սերգեյ Նևերովը, Սևաստոպոլի նահանգապետի ժամանակավոր պաշտոնակատար Սերգեյ Մենյայլոն, Ղրիմից և Սևաստոպոլից Դաշնության խորհրդի սենատոր Օլգա Կովատիդին, ինչպես նաև Լուգանսկի աշխարհազորայինների ներկայացուցիչ Գերման Պրոկոպևը, Լուգանսկի մարզի ժողովրդական նահանգապետ Վալերի Բոլոտովը, այսպես կոչված Դոնեցկի Ժողովրդական Հանրապետության առաջնորդներից Անդրեյ Պուրգինըև Դենիս Պուշիլինը, Դոնբասի ժողովրդական աշխարհազորի փոխղեկավար Սերգեյ Ցիպլակովը, Սլավյանսկում Դունբասի ժողովրդական պաշտպանության ղեկավար Իգոր Ստրելկովը:

Ապրիլի 28-ին ԱՄՆ-ի իշխանություններն արդեն հայտարարել են պատժամիջոցների ցուցակն ընդլայնելու մասին՝ դրանում ներառելով ՌԴ-ի ևս յոթ պաշտոնատար անձանց և 17 ընկերությունների: Ավելի ուշ Եվրախորհուրդը Եվրամիության անունից որոշում էր ընդունել 15 մարդով ավելացնել ռուսաստանցիների ցուցակը, որոնք նկատմամբ կիրառվել են ԵՄ-ի երկրորդ փուլի պատժամիջոցները՝ ակտիվների սառեցում և այցագրեր տրամադրելու արգելք Ուկրաինայի իրադարձությունների կապակցությամբ: Այժմ Եվրամիության պատժիչ ցուցակում ներառված է 48 մարդ: