Ռուսաստանում արտագնա աշխատողների մատնահետքերից բացի նաև ԴՆԹ-ի նմուշներ են վերցնելու

Ռուսաստանի Միգրացիայի համերկրային ծառայությունը (ՄՀԾ) վերցրել է արդեն մոտավորապես 3,7 միլիոն արտագնա աշխատողների մատնահետքերը և ծրագրում է ստանալ նաև նրանց ԴՆԹ-ի նմուշները:

Ինչպես ապրիլի 29-ին Դաշնության խորհրդում հիշեցրել է ՌԴ-ի ՄՀԾ-ի ղեկավար Կոնստանտին Ռոմոդանովսկին, Ռուսաստանում աշխատանք փնտրող բոլոր օտարերկրացիներից մատնահետքեր են վերցնում: «2013 թվականի ընթացքում ստացվել է ավելի քան 3 մլն դակտոքարտ, ընթացիկ շրջանում՝ ավելի քան 700 հազար»,-ասել է Ռոմոդանովսկին:

Նրա խոսքով՝ միգրացիոն ծառայությունը Հետաքննչական կոմիտեի հետ միասին նույնիսկ մտածում է ԴՆԹ-ի փորձաքննություն կազմակերպել նրանց համար, ովքեր ժամանում են և աշխատելու թույլտվություն ստանում, բայց «դա՝ ապագայում»:

Ռոմոդանովսկին նշել է նաև, որ ԱՊՀ-ի բնակչության մեկ երրորդը վերջին չորս տարվա ընթացքում եղել է Ռուսաստանում:

«Վերջին չորս տարվա ընթացքում մեր երկիր ժամանողների թիվն ավելացել է գրեթե 40 տոկոսով: Մեզ մոտ եղել են ԱՊՀ-ի ողջ բնակչության մեկ երրորդը և նրա տնտեսապես ակտիվ հատվածի երկու երրորդը»,-ասել է նա Դաշնության խորհրդում:

Ռոմոդանովսկին ճշտել է, որ բոլոր ժամանածների համար միգրացիոն ծառայությունն էլեկտրոնային դոսյե ունի:

Ընդամենն անցյալ տարի Ռուսաստան է այցելել գրեթե 17,7 միլիոն մարդ: Ժամանողների կառուցվածքը գործնականում չի փոխվել: Նրանց գրեթե երրորդ մասը կազմում են ԱՊՀ-ի քաղաքացիները: Ժամանածների ավելի քան 13 տոկոսը Եվրամիության պետությունների քաղաքացիներ են:

Միգրացիոն ծառայության տվյալներով՝ ընդամենը Ռուսաստանում այժմ գտնվում է 10,9 մլն օտարերկրյա քաղաքացի: Նրանց գալու նպատակները տարբեր են՝ ուսում, զբոսաշրջություն, մասնավոր այցեր, հաղորդել է ՌԻԱ Նովոստին: