Վրաստանի ԿԸՀ-ն տեղական ընտրություններին մասնակցելու համար գրանցել է 26 կուսակցություն

Աշխարհ 5 Մայիս, 2014 22:27

Վրաստանի Կենտրոնական ընտրական հանձնաժողովն (ԿԸՀ) ավարտել է քաղաքական կուսակցությունների գրանցման գործընթացը տեղական ինքնակառավարման մարմինների՝ հունիսի կեսին պլանավորված ընտրություններին մասնակցելու համար:

«Ինտերպրեսնյուս» գործակալության հաղորդագրության համաձայն՝ ընտրություններին մասնակցելու համար գրանցում է անցել 26 քաղաքական կազմակերպությունն, ևս վեցի գրանցումը մերժել են: Ներկայում Կենտրոնական ընտրական հանձնաժողովում ընթանում է ընտրադաշինքների գրանցումը:

Վրաստանում տեղական ինքնակառավարման մարմինների և քաղաքապետների ընտրությունները կանցկացվեն հունիսի 15-ին:

Քվեարկության արդյունքում կընտրվի 71 տեղական խորհուրդ (Սակրեբուլո), որոնցում կընդգրկվի 2088 մարդ: Ուղղակի ընտրությունների միջոցով կընտրվեն նաև 12 ինքնակառավարվող քաղաքների քաղաքապետներ և տեղական վարչակազմերի 59 ղեկավարներ (գամգեբելներ):

Վերջին անգամ Վրաստանում տեղական ընտրություններն անցկացվել են 2010 թվականին, երբ տեղական խորհուրդներում տեղերի ճնշող մեծամասնությունն ստացան այդ ժամանակաշրջանում կառավարող «Միասնական ազգային շարժում» կուսակցության ներկայացուցիչները, որը երկու տարի հետո կայացած խորհրդարանական ընտրություններում դիրքերը զիջեց «Վրացական երազանք» կոալիցիային: Վրաստանում 2013 թվականի նախագահական ընտրություններում նույնպես հաղթեց «Վրացական երազանք» կոալիցիայի ներկայացուցիչ Գեորգի Մարգվելաշվիլին, հաղորդել է «Նովոստի Գրուզիան»: