Տուրչինովի հրամանագրով Օդեսայի մարզի պետական վարչակազմի ղեկավարը հեռացվել է պաշտոնից

Ուկրաինայի Գերագույն ռադայի նախագահ, պետության ղեկավարի պաշտոնակատար Ալեքսանդր Տուրչինովը Վլադիմիր Նեմիրովսկուն հեռացրել է Օդեսայի մարզային պետական վարչակազմի ղեկավարի պաշտոնից: Համապատասխան հրամանագիրը մայիսի 6-ին զետեղվել է նախագահի պաշտոնական կայքում: Այս մասին հայտնում է «Ինտերֆաքսը»:

Մեկ ուրիշ հրամանագրով Տուրչինովն այդ պաշտոնում նշանակել է Իգոր Պալիցային:

Օդեսայում «հակամայդանի» տասնյակ ակտիվիստներ են զոհվել Արհմիությունների տան շենքում բռնկված հրդեհի ժամանակ, որը արմատական «Աջ հատվածի» ծայրահեղականները և նրանց կողմնակիցները հրկիզել էին մայիսի 2-ին տեղի ունեցած ընդհարումների ընթացքում: Ըստ Ուկրաինայի ՆԳ նախարարության տվյալների՝ զոհվել է 42 մարդ: Դատախազությունը հայտնել է 46 զոհվածների մասին, իսկ Օդեսայի մարզային խորհրդի պատգամավոր Վադիմ Սավենկոն հայտարարել է, թե Կիևի իշխանությունները թաքցնում են Արհմիությունների տանը «հակամայդանի» զոհված ակտիվիստների վերաբերյալ ճշմարիտ տվյալները. ըստ նրա տեղեկությունների՝ զոհվել է 116 մարդ: Եվս 48 մարդ համարվում է անհայտ կորած:

Ուկրաինայի ներքին գործերի նախարար Արսեն Ավակովը խոստացել է Օդեսայում տեղի ունեցած իրադարձությունների հետաքննությանը ներգրավել օտարերկրացի տեսուչների:

«Օդեսայի իրադարձությունների հետաքննության արդյունքները կհրապարակվեն: Այժմ հետաքննությանը ներգրավում ենք օտարերկրացի փորձագետների: Անաչառության համար»,- գրել է նա Facebook-ի իր էջում: