Օլանդը հուսով է, որ իր աշխատանքի վերաբերյալ երկրում իշխող բացասական կարծիքը կփոխվի

Ֆրանսիայի պատմության մեջ ամենից քիչ ժողովրդականություն վայելող երկրի նախագահ Ֆրանսուա Օլանդը հուսով է, որ ֆրանսիացիներն իր աշխատանքի մասին կդատեն հնգամյա ժամկետի ավարտվելուց հետո:

Օլանդը Ֆրանսիայի նախագահ է ընտրվել 2012 թվականի մայիսի 6-ին՝ ընտրությունների երկրորդ տուրում հաղթանակ տանելով Նիկոլա Սարկոզիի նկատմամբ:

«Ես հաղթեցի, որովհետև իմ նախորդը ձախողվեց: Ֆրանսիացիներն ինձ ընտրեցին, որովհետև նրանք հույս ունեին, որ իրադրությունն արագորեն կփոխվի դեպի լավը: Բայց ես խնդրում եմ, որ ինձ դատեն նախագահական ժամկետի ավարտին»,-մայիսի 6-ին հայտարարել է Օլանդը BFMTV հեռուստաալիքի եթերում:

Նա ընդունել է, որ նախընտրական խոստումներից շատերը կատարել դեռ չի հաջողվել, բայց նշել է, որ իշխանություններն աշխատում են դրանց վրա: «Իմ խնդիրն է՝ Ֆրանսիան կրկին շարժման մեջ դնել… Նախքան ընտրությունները ես գիտեի երկրի իրադրությունը: Ես չէի սպասում, որ իրադրությունն օրեցօր կբարելավվի»,-ասել է նախագահը:

Օլանդն ընդգծել է, որ երկրի տնտեսական իրադրությունը աստիճանաբար շտկվում է, ՀՆԱ-ն դանդաղորեն աճում է, և հավաստիացրել է, որ ժամանակի ընթացքում նախընտրական խոստումները կկատարվեն:

Նախօրյակին հրապարակվել են Nice-Matin հրատարակության պատվերով CSA հետազոտական ինստիտուտի անցկացրած հարցման տվյալները, ըստ որոնց ֆրանսիացիների բացարձակ մեծամասնությունը (86 տոկոսը) բացասական է համարում երկրի նախագահի պաշտոնում Ֆրանսուա Օլանդի երկամյա աշխատանքի արդյունքները:

Հետազոտության արդյունքների համաձայն՝ հարցվածների 52 տոկոսը երկու տարի անց նախագահի աշխատանքը գնահատել է՝ խիստ բացասական, 34 տոկոսը՝ բավականին բացասական, 13 տոկոսը՝ բավականին դրական, և միայն 1 տոկոսը՝ շատ դրական: Օլանդի ընտրողների մեկ երրորդից ավելին, ովքեր նախագահական ընտրություններում նախապատվությունը նրան էին տվել, հայտարարել է, որ այսօր նրան չէր աջակցի (նրանց 16 տոկոսը՝ միանշանակ, 19 տոկոսը՝ ամենայն հավանականությամբ):

Ֆրանսիացիների մեծամասնությունը դժգոհ է երկրի իրադրությունից, այն բանից, որ նոր իշխանությունները չկատարեցին իրենց խոստումների մեծ մասը և այն բանից, որ սոցիալիստներն, ըստ էության, շարունակում են վարել Սարկոզիի քաղաքականությունը, որը միտված է խիստ խնայողության միջոցառումներին, հաղորդել է ՌԻԱ Նովոստին: