Գերագույն ռադան մերժել է նախագահական ընտրությունների օրը հանրաքվե անցկացնելու գաղափարը

Ուկրաինայի Գերագույն ռադան չի պաշտպանել երկրի տարածքային ամբողջականության հարցի շուրջ հանրաքվեն երկրի՝ մայիսի 25-ի նախագահական ընտրությունների հետ միաժամանակ անցկացնելու գաղափարը: Այդ մասին հայտնել է «Բատկիվշչինա» խմբակցությունից պատգամավոր Ալեքսանդր Բրիգինեցը: Այս մասին տեղեկացնում է «Ուկրինֆորմը»:

Նրա խոսքով՝ հանրաքվեն հարկավոր է անցկացնել, բայց ոչ պատերազմի ժամանակ: Նրա հետ համակարծիք է եղել ներկա գտնվող պատգամավորների մեծամասնությունը: «Կողմ» է քվեարկել 154 մարդ: «Օրինագիծը չի անցել: Փառք Աստծո»,-գրել է Բրիգինեցը Facebook-ի իր էջում:

Խոսելով այն մասին, թե ինչու է ինքը դեմ եղել քվեարկության անցկացմանը, խորհրդարանականը նշել է. «Չի կարելի հանրաքվե անցկացնել ինքնաձիգների փողերի ներքո»:

Մայիսի 6-ին Գերագույն ռադայի կայքում հրապարակվել էր Ուկրաինայի կառավարության կողմից պատրաստված «2014 թվականի մայիսի 25-ին համաուկրաինական կոնսուլտատիվ հարցում անցկացնելու մասին» օրինագիծը: Դրան կից բացատրագրի համաձայն՝ այն մշակվել է մայիսի 25-ին Ուկրաինայի նախագահի արտահերթ ընտրությունների հետ միաժամանակ համաուկրաինական կոնսուլտատիվ հարցման անցկացումն ապահովելու նպատակով: Հարցմանը ներկայացվող հարցերը սահմանվում են Ուկրաինայի Գերագույն ռադայի որոշմամբ:

Օրինագծում նշված է, որ «համաուկրաինական հանրային հարցումն ունի խորհրդակցական բնույթ, իսկ հարցման մասնակիցների մեծամասնության կարծիքը, որոնք մասնակցել են ներկայացված հարցի քվեարկությանը, քննարկվում և նկատի է առնվում պետական իշխանության այն մարմինների կողմից որոշումներ կայացնելիս, որոնց այն վերաբերում և որոնց լիազորություններին վերագրվում: