Պենտագոնը մտադիր է մեծացնել ռազմական ներկայությունն ամբողջ աշխարհում. Չաք Հեյգել

Պենտագոնը, չնայած զինված ուժերի ու նրանց ֆինանսավորման կրճատմանը, մտադիր է ամրապնդել ռազմական ներկայությունն ամբողջ աշխարհում և ակտիվացնել պաշտպանական համագործակցությունը դաշնակիցների հետ: Այդ մասին տեղեկացնում է ԱՄՆ-ի պաշտպանության նախարար Չաք Հեյգելը:

«Այսօր ամերիկացի զինվորականները ներկա են շուրջ հարյուր երկրում, խոսքն ամբողջ աշխարհում մոտավորապես 400 հազար մարդու մասին է... Մեր բյուջեի նախագիծը և պաշտպանական ռազմավարությունը պարզորոշ հասկանալ են տալիս, որ, թեև մենք կրճատում ենք զինված ուժերը, չպետք է պարզապես վերադառնանք կայազորներ: Մենք պետք է շարունակենք ուժեղացնել դաշնակիցների հնարավորությունները, ձևավորենք նոր դաշինքներ և ամրապնդենք հները, ներդրումներ անենք անվտանգության համատեղ ապահովման նախագծերում»,- ասել է Հեյգելը՝ ելույթ ունենալով միջազգային հարաբերությունների Չիկագոյի խորհրդում:

Նրա խոսքով՝ ներկայումս շեշտը դրվում է Ասիա-խաղաղօվկիանոսյան տարածաշրջանի վրա, բայց կարևոր են նաև մյուսները: Նախարարը հիշեցրել է Ֆիլիպիններում, Ավստրալիայում, Սինգապուրում, Ճապոնիայում և Հարավային Կորեայում ամերիկացի զինվորականների ներկայության մասին:

ԱՄՆ-ն նաև մտադիր է ուժեղացնել փոխգործակցությունը բազմակողմ միավորումների, ոչ միայն ՆԱՏՕ-ի, այլև ԱՍԵԱՆ-ի և Պարսից ծոցի արաբական պետությունների համագործակցության խորհրդի հետ, հաղորդել է ՌԻԱ Նովոստին: