Եվրամիությունը չի բացառում Ուկրաինայի իրադրությանը նվիրված ժնևյան երկրորդ հանդիպման անցկացումը

ԵՄ-ն չի բացառում Ուկրաինայի ճգնաժամին նվիրված ժնևյան երկրորդ հանդիպման անցկացումը: Այդ մասին մայիսի 7-ին Բրյուսելում կայացած մամուլի ասուլիսում ասել է Եվրախորհրդի ղեկավար Հերման վան Ռոմպյոյը: Այս մասին հայտնում է ria.ru-ն:

«Մենք պատրաստ ենք քննարկել երկրորդ ժնևյան հանդիպման գաղափարը: Մենք գործընկերների հետ կաշխատենք այն անցկացնելու հնարավորության շուրջ»,-ասել է վան Ռոմպյոյը:

Ապրիլի 17-ին Ժնևում ՌԴ-ն, ԱՄՆ-ը, ԵՄ-ն և Ուկրաինան պայմանավորվել են հակամարտության ապա էսկալացման միջոցառումների շուրջ՝ նկատի ունենալով անօրինական կազմավորումների զինաթափումը, ապօրինաբար գրավված շենքերի ազատումը և սահմանադրական բարեփոխման շուրջ ազգային երկխուսություն սկսելը:

Եվրախորհրդի նախագահը նաև հայտնել է, որ արդյունաբերապես զարգացած յոթ առաջատար երկրների ղեկավարները հունիսին Բրյուսելում կայանալիք հանդիպմանը կքննարկեն Ուկրաինայի իրադրությունը: «Ուկրաինայի իրադարձությունները կլինեն G7-ի՝ Բրյուսելում կայանալիք հանդիպման ուշադրության կենտրոնում»,-ասել է նա:

Մեծ Բրիտանիայի, Գերմանիայի, Իտալիայի, Կանադայի, ԱՄՆ-ի, Ֆրանսիայի, Ճապոնիայի ղեկավարները, ինչպես նաև Եվրախորհրդի և Եվրահանձնաժողովի նախագահներ Հերման Վան Ռոմպյոյը և Ժոզե Մանուել Բառոզուն հունիսի 4-5-ին «յոթնյակի» ձևաչափով հանդիպում կանցկացնեն Բրյուսելում: